Venesuela hökuməti ABŞ-a səyahət edən və ya tranzitlə keçən vətəndaşları üçün xəbərdarlq edib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Venesuela Xarici İşlər Nazirliyinin internet saytında dərc edilən açıqlamada ABŞ-da qarşılaşa biləcəkləri risklər və mənfi şərtlərlə əlaqədar venesuelalılara xəbərdarlıq edildiyi bildirilib.
Açıqlamada, son aylarda ABŞ-da venesuelalılara qarşı ixtiyari immiqrasiya nəzarəti tədbirlərinin və təqib siyasətlərinin artdığı vurğulanıb:
“ABŞ hakimiyyət orqanları tərəfindən özbaşına həbslər, səbəbsiz deportasiyalar, əmlak və sənədlərin ələ keçirilməsi, ayrı-seçkilik və ləyaqəti alçaldan rəftar halları sənədləşdirilmişdir. Bu hərəkətlərə insan hüquqlarının kobud şəkildə pozulması, üçüncü ölkələrin həbsxanalarında qanuni proses olmadan həbs edilməsi və adam oğurluğu daxildir”.
