Nepalda baş verən dağıdıcı daşqınlardan 9 gün sonra xilasedicilər tunellərdə axtarış-xilasetmə əməliyyatlarını davam etdirirlər. Son məlumatlara görə, dağıntılar altında qalan tunellərdən birində iki nəfər sağ-salamat xilas edilib.
“Operativ Məlumat Mərkəzi-OMM” xəbər verir ki, xilasetmə işləri əsasən dörd su-elektrik stansiyası ətrafında aparılır.
Mütəxəssislər tunellərdə hava boşluqlarının qalmasının insanların uzun müddət sağ qalmasına imkan verə biləcəyini bildirirlər. Xilasedicilər sağ qalanların tapılması ümidi ilə tunellərə oksigen vururlar.
Təbii fəlakət nəticəsində Nepalda əmlak, evlər və infrastruktur obyektlərinə azı 387,5 milyard Nepal rupisi, yəni təxminən 2,56 milyard dollar ziyan dəyib.
Daşqınların yaratdığı palçıq, qaya və dağıntılar tunellərin girişlərini bağladığından xilasetmə işləri ciddi çətinliklərlə üzləşir. Mühəndislər və xilasedicilər texniki məlumatları operativ şəkildə paylaşmaq üçün 500-dən çox üzvün olduğu “WhatsApp” qrupundan istifadə edirlər.
Rəsmilərin ehtimalına görə, təxminən 900 itkin şəxsin taleyi altı su-elektrik stansiyası ilə bağlı ola bilər. Fəlakət nəticəsində ölkənin elektrik enerjisi istehsal gücünün təxminən 10 faizi sıradan çıxıb.
