Çitada beşmərtəbəli yaşayış binasının mənzillərindən birində elektrikli velosipedin akkumulyatorunun partlaması nəticəsində yanğın baş verib, bir nəfər ölüb.
“Operativ Məlumat Mərkəzi–OMM” xəbər verir ki, bu barədə Rusiya Fövqəladə Hallar Nazirliyinin Trans-Baykal ərazisi üzrə Baş İdarəsinin mətbuat xidməti məlumat yayıb.
Məlumata görə, yanğın mənzilin dəhlizində enerji yığan elektrikli velosipedin batareyasının nasazlığı səbəbindən başlayıb. Hadisə zamanı mənzildə beş nəfər, o cümlədən iki uşaq olub.
Yanğın ümumilikdə 40 kvadratmetr ərazini əhatə edib və tam söndürülüb. Hadisənin dəqiq səbəbləri araşdırılır.
