ABŞ-nin müdafiə naziri Pit Hegset Kolorado ştatına səfəri çərçivəsində jurnalistlərin suallarını cavablandırarkən İran ilə davam edən danışıqlar və mümkün hərbi müdaxilə ehtimalı barədə mühüm açıqlamalar verib.
“Operativ Məlumat Mərkəzi-OMM”-in xəbərinə görə, nazir qeyd edib ki, rəsmi Tehran mütləq yeni bir sazişə imza atmalıdır və Prezident Donald Tramp da məhz bu varianta üstünlük verir.
Hegsetin sözlərinə görə, əgər tərəflər arasında razılıq əldə olunmazsa, dövlət başçısına təqdim ediləcək müxtəlif planlar mövcuddur.
"Hər bir variant masadadır. Bu, tamamilə Prezidentin qərarından asılıdır. Biz bura razılığın əldə olunmasını təmin etmək üçün gəlmişik. Hesab edirəm ki, 'İran' üçün yaxşı bir saziş bağlamaq ən müdrik addım olar".
Digər tərəfdən, Prezident Donald Tramp Baş Qərargah rəisi Den Keynin İranla müharibəyə qarşı olması barədə yayılan iddiaları qəti şəkildə təkzib edib.
O, bu xəbərlərin tamamilə yalan olduğunu vurğulayaraq, razılaşma olmayacağı təqdirdə nəticələrin Tehran üçün ağır olacağı ilə bağlı xəbərdarlıq edib.
Xatırladaq ki, 2025-ci ilin iyununda kəsilən nüvə danışıqları fevralın 6-da Omanda, fevralın 18-də isə Cenevrədə yenidən bərpa olunub. Növbəti görüşün fevralın 26-da keçirilməsi planlaşdırılır.
