Ukrayna Silahlı Qüvvələrinin Baş Qərargahı Zaporojye vilayətinin və Krımın işğal olunmuş ərazilərində iki körpüyə zərbələr endirib.
"Operativ Məlumat Mərkəzi-OMM" xəbər verir ki, bu barədə Ukrayna Silahlı Qüvvələrinin Baş Qərargahının məlumatında bildirilib.
Bundan əlavə, qurumdan Rusiyanın Krasnodar diyarındakı "Slavyanski" neft emalı zavoduna endirilən zərbənin nəticələri barədə məlumat verilib. Bildirilib ki, ümumi həcmi 35 min kubmetr olan dörd rezervuar məhv edilib, ümumi tutumu 30 min kubmetr olan daha doqquz rezervuar, eləcə də neft emalı qurğusu zədələnib.
Qurumun məlumatına görə, iyunun 29-da və 30-na keçən gecə Ukrayna Müdafiə Qüvvələrinin bölmələri Rusiyanın hərbi-iqtisadi potensialının azaldılması üzrə əməliyyatlar çərçivəsində bir sıra obyektlərə zərbələr endirib.
Xüsusilə, Zaporojye vilayətinin işğal olunmuş ərazisindəki Azovskoye ərazisində yerləşən avtomobil körpüsünə, eləcə də Krımda yaşayış məntəqəsi ərazisindəki dəmir yolu körpüsünə zərbə endirilib.
