Azərbaycanda məktəbli geyimi ilə bağlı qaydalar yenidən müzakirə olunur. Mövzu Türkiyənin bəzi media qurumlarında və sosial şəbəkələrdə də diqqət çəkib. Azərbaycandakı məktəbli forması qaydalarını tənqid edənlərə cavab olaraq Türkiyənin öz təhsil qanunvericiliyindəki geyim tələbləri də gündəmə gətirilir.
"Operativ Məlumat Mərkəzi-OMM" xəbər verir ki, Azərbaycanda ümumtəhsil məktəblərində şagirdlərin geyim forması müvafiq qanunvericilik və Nazirlər Kabinetinin qərarları ilə müəyyən edilir. Məqsəd məktəblərdə vahid geyim standartını qorumaq, şagirdlər üçün ümumi qaydalar müəyyənləşdirmək və təhsil mühitində nizam-intizamı təmin etməkdir.
Son günlər Türkiyənin bəzi media resurslarında və ictimai platformalarda Azərbaycanın məktəbli geyimi qaydaları, xüsusilə dini geyimlə bağlı yanaşmalar tənqid olunur. Bu müzakirələrdə sərt və təhqiramiz ifadələrə də rast gəlindiyi bildirilir.
Məsələyə münasibət bildirənlər isə Türkiyənin öz məktəbli geyimi qaydalarına diqqət çəkərək, iki ölkədə tətbiq olunan yanaşmaların müqayisə edilməsinin vacibliyini vurğulayırlar.
Türkiyədə məktəblərdə baş örtüyü ilə bağlı qaydalar necədir?
Türkiyədə məktəbli geyimini tənzimləyən əsas sənədlərdən biri 26 noyabr 2012-ci il tarixli, 2012/3959 nömrəli qərarla təsdiq edilmiş “Millî Eğitim Bakanlığına Bağlı Okul Öğrencilerinin Kılık ve Kıyafetlerine Dair Yönetmelik”dir.
Həmin qaydalara 2014-cü ildə edilən dəyişikliklərlə orta məktəb və lisey şagirdlərinin baş örtüyündən istifadəsinə qoyulan məhdudiyyət aradan qaldırılıb.
Qaydaların 4-cü maddəsinin “e” bəndində isə məktəbəqədər təhsil müəssisələrində və ibtidai məktəblərdə şagirdlərin məktəb daxilində başıaçıq olması tələbi yer alır.
Bu müddəalar müxtəlif yaş qruplarına fərqli geyim tələblərinin tətbiq edilməsi ilə bağlı müzakirələrə səbəb olur. Tənqidçilər hesab edirlər ki, uşaqların geyimi ilə bağlı qaydalar müəyyən edilərkən onların yaşı, hüquqları və psixoloji inkişaf xüsusiyyətləri nəzərə alınmalıdır.
Azərbaycan və Türkiyədəki yanaşmalar niyə müqayisə olunur?
Müzakirələrin əsas məqamlarından biri təhsildə dünyəvilik prinsipidir. Azərbaycanda məktəbli forması ilə bağlı vahid qaydaların tətbiqi ümumi təhsil mühitinin təşkilinin bir hissəsi kimi təqdim olunur.
Türkiyədə isə məktəbli geyimi qaydaları müxtəlif dövrlərdə dəyişikliklərə məruz qalıb. Bu dəyişikliklər dini geyim, dünyəvilik və təhsil müəssisələrində tətbiq edilən standartlarla bağlı ictimai müzakirələrə səbəb olub.
Azərbaycanın məktəbli geyimi siyasətini tənqid edən bəzi Türkiyə media və ictimai platformalarının öz ölkələrindəki qaydalarla bağlı müzakirələrə də diqqət yetirməsinin vacibliyi vurğulanır.
Nəticə etibarilə, məktəbli geyimi məsələsi yalnız xarici görünüşlə bağlı deyil. Bu mövzu həm də təhsilin təşkili, uşaqların hüquqları, dünyəvilik prinsipi və məktəblərdə ümumi qaydaların tətbiqi ilə əlaqəlidir. (Qafqazinfo)
