Türkiyənin Milli Kəşfiyyat Təşkilatı (MİT) və Daxili İşlər Nazirliyinin Baş Təhlükəsizlik İdarəsinin birgə əməliyyatı nəticəsində İran kəşfiyyat xidmətləri üçün siyasi və hərbi casusluqda şübhəli bilinən altı şəxs saxlanılıb.
"Operativ Məlumat Mərkəzi-OMM" xəbər verir ki, saxlanılanların İslam İnqilabı Keşikçiləri Korpusunun kəşfiyyat şəbəkəsi ilə əlaqəli olduqları ehtimal edilir.
Əməliyyat nəticəsində müəyyən olunub ki, şübhəlilər Türkiyədə, həmçinin xaricdə yerləşən hərbi bazalar və strateji obyektlər barədə məlumat toplayıblar. Türkiyə mediasının yazdığına görə, saxlanılan şəxslər Adanadakı “İncirlik” Hava Bazasını müşahidə edərək toplanmış kəşfiyyat və logistika məlumatlarını İran kəşfiyyatına ötürüblər. Onlar həmçinin Türkiyə vasitəsilə üçüncü ölkələrə pilotsuz uçuş aparatlarının daşınmasını izləyiblər.
Əməliyyat eyni vaxtda Ankara, İstanbul, Van, Samsun və Yalovada həyata keçirilib.
