ABŞ Prezidenti Donald Tramp Danimarka və Avropa İttifaqı ölkələrinə qarşı sərt bəyanatlarla çıxış edərək, Qrenlandiya məsələsi ilə bağlı yeni iqtisadi sanksiyalar elan edib. Trampın sözlərinə görə, Vaşinqton onilliklər ərzində Avropanı təmənnasız dəstəkləyib, lakin artıq bu münasibətlərin qarşılığının verilmə vaxtı çatıb.
Təhlükəsizlik və strateji maraqlar
Ağ Ev rəhbəri iddia edib ki, Çin və Rusiya Qrenlandiyaya maraq göstərir və Danimarkanın bu ərazini təkbaşına qorumaq imkanı yoxdur. O, adanın müdafiə potensialını tənqid edərək, ABŞ-ın milli təhlükəsizliyi üçün bu ərazinin həyati əhəmiyyət kəsb etdiyini vurğulayıb. Tramp bildirib ki, Qrenlandiya ABŞ-ın müasir silah sistemlərinin və "Qızıl Qübbə" layihəsinin tam səmərəli işləməsi üçün vacibdir.
8 ölkəyə qarşı gömrük rüsumları
Tramp Qrenlandiya ilə bağlı fəaliyyət göstərən 8 Avropa ölkəsi üçün xüsusi rüsum cədvəlini açıqlayıb:
- Danimarka, Norveç, İsveç, Fransa, Almaniya, Böyük Britaniya, Niderland və Finlandiya üçün 1 fevral 2026-cı il tarixindən etibarən 10 faiz gömrük rüsumu tətbiq olunacaq.
- 1 iyun 2026-cı ildən isə bu rüsumun dərəcəsi 25 faizə qaldırılacaq.
Prezident qeyd edib ki, bu rüsumlar Qrenlandiyanın tamamilə satın alınması barədə saziş imzalanana qədər qüvvədə qalacaq. O, ABŞ-ın bu məqsədlə 150 ildən artıqdır cəhd göstərdiyini, lakin Danimarkanın hər zaman rədd cavabı verdiyini xatırladıb.
Danimarkanın mövqeyi
Qeyd edək ki, Danimarka Krallığının tərkibində muxtar bölgə olan Qrenlandiya daha əvvəl suverenliyin verilməsi ilə bağlı bütün təklifləri rədd edib. Rəsmi Kopenhagen bölgədəki hərbi əməkdaşlığı müttəfiqləri ilə birgə gücləndirməyə çağırıb. Vaşinqtonda keçirilən son görüşlərdə tərəflər arasında fundamental fikir ayrılıqlarının qaldığı bildirilir.
