Afət Ziyadqızı
ABŞ-nin keçmiş prezidenti Barak Obama Donald Tramp haqqında şəxsi fikirlərini dərc edib.
"Operativ Məlumat Mərkəzi-OMM" xəbər verir ki, bu barədə "The New Yorker" nəşri məlumat yayıb.
Məlumata görə, 2016-cı ildə ənənəvi andiçmə mərasimi ərəfəsində Oval Ofisdə baş tutan görüş zamanı Trampın dövlət işlərinə yanaşması Obamanı heyrətləndirib. Keçmiş prezident qeyd edib ki, Trampın milli təhlükəsizlik məsələlərinə qarşı nümayiş etdirdiyi maraqsızlıq və "savadsızlıq" gözlənilməz olub.
Bildirilib ki, Tramp Rusiya və Şimali Koreyadan gələn potensial təhdidlərlə bağlı ciddi müzakirələrə laqeyd yanaşaraq, daha çox öz seçki kampaniyası mitinqlərindəki izdiham və iştirakçıların sayı ilə öyünməyə üstünlük verib. Obama hazırkı Ağ Ev rəhbəri haqqında heç bir illüziyasının olmadığını qətiyyətlə vurğulayıb.
Qeyd olunub ki, Donald Tramp da öz növbəsində sələfinin ünvanına tənqidi fikirlər səsləndirib. Aprelin 25-də verdiyi bəyanatda o, Obamanın hakimiyyəti dövründə Vaşinqtonun mənzərəsinin indikindən daha pis olduğunu və paytaxtın baxımsız qalaraq "bataqlığa" bənzədiyini iddia edib.
