ABŞ İrana Qarşı Hansı Yeni Hərbi Addımları Planlaşdırır?
ABŞ Prezidenti Donald Tramp və administrasiyası İrana qarşı məhdud hərbi zərbələrin bərpası və strateji əhəmiyyətli Hörmüz boğazının blokadası ssenarilərini aktiv şəkildə araşdırır.
“Operativ Məlumat Mərkəzi-OMM” xəbər verir ki, bu barədə "The Wall Street Journal" nəşri mənbələrə istinadən məlumat verir.
Bu addımlar aprelin 12-də Pakistanda baş tutan danışıqların iflasa uğramasından sonra gündəmə gəlib.
Məlumata görə, Donald Tramp genişmiqyaslı bombardman kampaniyasına qayıtmağı da istisna etmir. Lakin regionda qeyri-sabitliyin artması riski və uzunmüddətli hərbi münaqişəyə cəlb olunmaq istəməməsi səbəbindən bu, ən az ehtimal olunan variant sayılır. Alternativ olaraq, müttəfiqlərin gəmilərin hərbi müşayiətində daha fəal iştirakını təmin etmək üçün onlara təzyiq vasitəsi kimi Hörmüz boğazının müvəqqəti blokadası nəzərdən keçirilir.
ABŞ və İsrailin Hərbi Əməliyyatları: Bölgədə Nələr Baş Verdi?
Xatırladaq ki, ABŞ və İsrail fevralın 28-də İrana qarşı birgə hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb. Buna cavab olaraq İran, İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdəki hədəflərə zərbələr endirməyə başlayıb.
Hörmüz Boğazında Atəşkəs və Pakistan Danışıqları
Gərginliyin fonunda İran, ABŞ və müttəfiqləri 2026-cı il aprelin 8-nə keçən gecə iki həftəlik atəşkəs barədə razılığa gəliblər. Rəsmi Tehran bildirib ki, bu müddət ərzində Hörmüz boğazından təhlükəsiz keçid İran Silahlı Qüvvələri ilə koordinasiya olunmaqla və texniki məhdudiyyətlər nəzərə alınmaqla təmin ediləcək.
Proseslərin davamı olaraq, aprelin 11-12-də İslamabadda Pakistanın vasitəçiliyi ilə İran və ABŞ arasında yeni danışıqlar aparılıb.
