Tokayev Yaxın Şərqdə atəşkəsi alqışladı

Qazaxıstan Prezidenti Kasım-Jomart Tokayev, qlobal diqqət mərkəzində olan Yaxın Şərqdə tam atəşkəs və barışıq barədə razılaşmanın əldə olunmasını rəsmən alqışlayıb.

“Operativ Məlumat Mərkəzi-OMM” xəbər verir ki, Qazaxıstan Prezidentinin mətbuat katibi Aybek Smadiyarov bu barədə məlumat yayaraq bildirib: "Prezident Kasım-Jomart Tokayev, Pakistanın Baş naziri Şahbaz Şərifin və Pakistan Silahlı Qüvvələrinin baş komandanı feldmarşal Asim Munirin vasitəçiliyi ilə Yaxın Şərqdə tam atəşkəs və barışıq barədə razılaşmanın əldə olunmasını alqışlayır".

Rəsmi bəyanatda xüsusi vurğulanıb ki, bu tarixi razılaşma ABŞ Prezidenti Donald Trampın və İranın ali rəhbərliyinin, eləcə də hərbi münaqişəyə cəlb olunmuş bütün ölkələrin xoş iradəsi və müdrikliyi sayəsində mümkün olub. Sonda K.Tokayev qlobal ticarətin inkişafı və bütün dövlətlərin iqtisadi rifahı məqsədilə əldə olunmuş bu barışığın uzunmüddətli xarakter daşıyacağına ümid etdiyini diqqətə çatdırıb.