Somali quldurları Qırmızı dəniz və Hörmüzdəki gərginlikdən istifadə edir

Qırmızı dəniz və Hörmüz boğazındakı gərginlik Somali quldurlarının fəaliyyətini artırıb.

“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.

Bildirilib ki, qarşıdurmalar səbəbindən beynəlxalq gəmiçilik marşrutlarının Afrika Buynuzuna yönəlməsi Somali quldurlarının fəaliyyətini son 10 ilin ən yüksək səviyyəsinə çatdırıb.

Təhlükəsizlik ekspertləri bildirirlər ki, ABŞ və İsrailin İranla qarşıdurması fonunda beynəlxalq hərbi-dəniz qüvvələrinin Hörmüz boğazı və Qırmızı dənizə yönəlməsi Somali sahillərində təhlükəsizlik boşluğu yaradıb.

Qırmızı dənizdəki ticarət gəmilərinin təxminən 70 faizinin Afrikanın cənubundakı Ümid burnundan keçən marşruta yönləndirilməsi gəmiləri Somali sahillərinə daha yaxın yolla hərəkət etməyə məcbur edir. Bu isə quldurlar üçün yeni imkanlar yaradır.

Məlumata görə, quldur qrupları hədəfləri müəyyənləşdirmək və əlaqə saxlamaq üçün "SpaceX" şirkətinin Starlink peyk internetindən istifadə etməyə başlayıb.

Bundan əlavə, edilən pulların yenidən bölgə iqtisadiyyatında dövr etməsi quldurluğa marağı artırır və daha çox insanın bu fəaliyyətə qoşulması riskini yüksəldir.

Ekspertlər hesab edirlər ki, 2011-2012-ci illərdə həyata keçirilən genişmiqyaslı beynəlxalq dəniz əməliyyatlarının hazırkı şəraitdə yenidən keçirilməsi çətindir. Onların fikrincə, problemin uzunmüddətli həlli üçün ilk növbədə Somalidə siyasi sabitlik təmin edilməlidir.