Avstraliyanın Sidney şəhərində İsrail Prezidenti İshak Hersoqun rəsmi səfərinə etiraz edən nümayişçilərlə təhlükəsizlik qüvvələri arasında şiddətli toqquşmalar yaşanıb.
"Operativ Məlumat Mərkəzi-OMM" xarici KİV-ə istinadən xəbər verir ki, Sidney meriyası yaxınlığında toplaşan minlərlə etirazçını ərazidən uzaqlaşdırmaq istəyən polislə kütlə arasında yaranan qarşıdurma nəticəsində 27 nəfər saxlanılıb.
Saxlanılanlardan 10-u polis əməkdaşlarına hücum etməkdə ittiham olunur.
Baş nazir Entoni Albaneze baş verən zorakılıq hadisələrindən sarsıldığını bildirərək, vətəndaşları öz fikirlərini dinc şəkildə ifadə etməyə səsləyib. O, "Triple M" radiosuna verdiyi müsahibədə vurğulayıb:
"Avstraliyalılar münaqişənin ölkəyə gətirilməsini istəmirlər. İstər israilli, istərsə də fələstinli olsun, hər kəs qətllərin dayandırılmasını arzulayır. Lakin bu cür zorakı mənzərələr heç bir məqsədə xidmət etmir, əksinə, prosesə zərər verir".
Qeyd edək ki, Hersoqun səfəri dekabr ayında Bondi Beach ərazisində 15 nəfərin ölümü ilə nəticələnən kütləvi atışmadan sonraya təsadüf edir. Bu səbəbdən polisə nadir hallarda tətbiq olunan xüsusi səlahiyyətlər, o cümlədən kütləni istiqamətləndirmək və nəqliyyat vasitələrində axtarış aparmaq hüququ verilib. "Palestine Action Group" tərəfindən bu məhdudiyyətlərə qarşı qaldırılan məhkəmə iddiası isə rədd edilib.
Hadisə yerindən yayılan görüntülərdə polisin kütləni dağıtmaq üçün gözyaşardıcı qaz və bibər spreyindən istifadə etdiyi əks olunub. Yeni Cənubi Uels ştatının baş naziri Kris Minns polisin hərəkətlərini müdafiə edərək, zabitlərin gərgin vəziyyətdə çətin qərarlar vermək məcburiyyətində qaldığını qeyd edib. Digər tərəfdən, etirazçı qruplar polisin həddindən artıq güc tətbiq etdiyini iddia edərək, aksiyaların davam edəcəyini bildiriblər.
