Birləşmiş Ərəb Əmirliklərinin paytaxtı Əbu-Dabidə Ukrayna, Rusiya və ABŞ nümayəndələri arasında Rusiya–Ukrayna münaqişəsinin nizamlanmasına dair danışıqların ikinci günü start götürüb.
"Operativ Məlumat Mərkəzi-OMM"-in məlumatına görə, bu barədə Ukrayna Milli Təhlükəsizlik və Müdafiə Şurasının katibi Rüstəm Umerov özünün “Telegram” kanalında açıqlama verib.
Umerov bildirib ki, danışıqlar əvvəlki günlə eyni iş formatında davam etdirilir. Onun sözlərinə görə, proses çərçivəsində üçtərəfli məsləhətləşmələr, işçi qruplarda müzakirələr və daha sonra tərəflərin mövqelərinin sinxronlaşdırılması həyata keçirilir. Nəticələrin isə danışıqlar başa çatdıqdan sonra açıqlanacağı qeyd olunub.
Xatırladaq ki, Əbu-Dabidə keçirilən danışıqların cari raundunun ilk günü dünən baş tutub. Ümumilikdə isə Ukrayna, Rusiya və ABŞ arasında bu formatda danışıqların ilk raundu yanvarın 23–24-də keçirilib. Əvvəlcə fevralın 1-nə planlaşdırılan görüşlər sonradan fevralın 4–5-nə təxirə salınıb.
