“Dünən Türkiyədə keçirilən seçkilər Türkiyəni, Türk dünyasını sevməyən qüvvələrin ümidlərini puç etdi”.

Bunu "Operativ Məlumat Mərkəzi-OMM"-ə açıqlamasında Milli Məcilisin deputatı Məlahət İbrahimqızı deyib.

Deputat qeyd edib ki, beynəlxalq media orqanlarının Ərdoğana qarşı apardıqları qarayaxmanın arxasında şər-böhtan, məkirli planlar dayanır.

“14 mayda qardaş Türkiyədə keçirilən həm Parlament, həm Prezident seçkiləri Türkiyəni, Türk dünyasını sevməyən qüvvələrin bütün arzularını puç etdi. Fransa, Almaniya, ABŞ mətbuatında Türkiyədə totalitar rejimin olduğu qeyd olunurdu. Ərdoğan rejimini tənqid edirdilər, amma dünənki seçkilər bir daha göstərdi ki, Türkiyəyə qarşı apardıqları qarayaxma kampaniyası, atdıqları şər-böhtan Türkiyəyə qarşı, Türk dünyasına qarşı məkirli planlardan qaynaqlanır. Dünən Türkiyədə dünyada görülməmiş, örnək seçki keçirildi. Birincisi, dünyanın nadir ölkələrində belə seçici fəallığı olur. Avropada və Amerikada artıq uzun illərdi ki, seçicilərin 20-25 faizi seçkilərdə iştirak etsə, bu, böyük uğur kimi qəbul olunur. Ona görə ki, artıq orda seçicinin siyasilərə inamı yoxdur. İnam olmadığına görə, seçkilərdə iştirak etmirlər. Amma dünən təxminən 60 milyon civarında insan seçkidə iştirak etdi. Və bir daha göstərildi ki, Türk xalqı üçün, Türkiyə dövləti üçün, Ərdoğan üçün demokratik dəyərlər nə dərəcədə müqəddəsdir və toxunulmaz bir prinsipdir. Dünən səçkiləri demokratiya bayramı adlandırırdılar. İnsident olmadan seçkini başa vurdular. Bu, növbəti dəfə Türk düşmənlərinə bir sillə idi”.

Rəcəb Tayyib Ərdoğana qarşı qarayaxma kampaniyası aparan media qurumlarını riyakar adlandıran deputat qeyd edib ki, onlar Ərdoğan hakimiyyətinin devirilməsi üçün əllərindən gələni etməyə hazır idilər.

“Türkiyəyə qarşı olan mətbuat orqanları riyakardır. Ərdoğan kimi güclü lider onlara sərf etmir. Onlar Ərdoğanın hakimiyyətdən devrilməsi üçün əllərindən gələni etməyə hazır idilər. Və bu çirkin niyyətlərini gizlətmirdilər. Dünyanın ən nüfuzlu media orqanları bunu ifadə edirdi. Lakin bunu bacarmadılar. Onu da qeyd etməliyik ki, dünənki seçkilərdəki uğur həm də Azərbaycanın uğurudur. Seçki hələ tam yekunlaşmamışdı, lakin məlum idi ki, Ərdoğanın rəhbərlik etdiyi “AK Partiya” Parlamentdə böyük üstünlük əldə edib. Cənab İlham Əliyev də gecə saatlarında zəng edərək Ərdoğanı təbrik etdi. Bu bir daha ölkələrimiz arasında olan qardaşlığın təzahürüdür. İstərdik ki, Türkiyəni dünyanın ən güclü dövlətlərindən birinə çevirən Ərdoğan qalib gəlsin".

Məlik Məlikov 

Azərbaycan respublikasında gələn ay baş tutacaq prezident seçkiləri ölkəmizin tarixində öz xüsusi əhəmiyyəti ilə seçilir. 

Bu fikirləri "Operativ Məlumat Mərkəzi-OMM"-ə müsahibəsində millət vəkili Tural Gəncəliyev bildirib.

Biz bunu dəfələrlə qeyd etmişik Azərbaycanın ilk seçkiləridir ki, bütün torpaqlarımız üzərində suverenliyimiz bərpa edildikdən sonra Qarabağ da daxil olmaqla, hər bir şəhələrimizdə, qəsəbələrimizdə bu seçki keçirilir. 

"Mən Xankəndi şəhərini təmsil edən millət vəkili olaraq çox xoşbəxtəm ki, artıq seçkilər Xankəndi şəhərində təşkil edilmiş seçki dairəsi üzrə keçiriləcək. Orada hazırda yaşayan, fəaliyyət göstərən insanlar məhz yerindəcə səs vermək hüququnu əldə edəcəklər. Çox önəmli və şərəfli tarixi prosesləri yaşayırıq. Bu seçkilər dünyaya yeni bir reallıq sərgiləmiş Azərbaycanın seçkiləridir. Artıq Azərbaycan əvvəlki Azərbaycan deyil, dünya səviyyəsində öz sözünü deyən regional və qlobal məsələlərlə öz mövqeyini, milli maraqlarını qoruyan güclü bir Azərbaycandır".

"Əminəm ki, bütün Azərbaycan xalqı öz konstitusiya hüququndan istifadə edərək ölkəmizi yeni Azərbaycan dediyimiz parlaq gələcəyə aparan seçkilərdə iştirak edərək, səs verəcəkdir! ",- deyə millət vəkili bildirib.

"Azərbaycan, artıq növbədənkənar prezident seçkilərinə də qalib tərəf kimi gedir".

Bu fikirləri "Operativ Məlumat Mərkəzi-OMM"-ə müsahibəsində politoloq Tural İsmayılov bildirib.

"Azərbaycan artıq qalib tərəf kimi regionda geniş şərtlər yaradır. Yeni şərtləri diqtə edən tərəfdir. Əlbəttə ki, qələbə qazanan bir ölkə kimi qalib diqtəsi yaradan Azərbaycan, artıq növbədənkənar prezident seçkilərinə də qalib tərəf kimi gedir və nəzərə almaq lazımdır ki, məhz Azərbaycanın ərazi bütövlüyü və suverenliyinin bərpasından sonra növbədənkənar prezident seçkilərinə gedilir. İlham Əliyev 2018-ci il seçkilərində də özünün və qarşısında duran əsas hədəfləri elan etmişdir və prezident seçildikdən sonra çox həssas və gərgin 2020-ci ildə qlobal pandemiyanın dünyanı cənginə aldığı bir vaxtda məhz prezident İlham Əliyev liderliyi ilə Azərbaycan öz torpaqlarını işğaldan azad etdi. Daha sonra isə 2023-cü ildə Azərbaycan lokal antiterror tədbirləri ilə suverenliyini tam bərpa etdi. Bundan sonra artıq ölkədə yeni reallıqlar yaranıb. 

Ölkənin regionda yeni reallıqların formalaşmasında rolu artıb və müstəqil Azərbaycanın tarixində bütün ölkə ərazisində bu seçkilər keçiriləcək. Nəzərə almaq lazımdır ki, bu seçkilər həm də ərazi bütövlüyümüzün və suverenliyimizin təsbiti deməkdir. Artıq torpaqları işğalda olmayan bir ölkədə prezident seçkiləri keçirilir. Prezident seçkiləri 2025-ci ildə olacaqdı. Ancaq dediyim kimi, artıq bu qələbədən sonra yeni reallıqlar formalaşıb, eyni zamanda bu reallıqların fonunda Azərbaycanın baxışı idarəetmə modeli ilə bağlı islahatlar həyata keçirilir. Qarşıda dövlətimizin böyük hədəfləri var və bu konteksdə növbədənkənar prezident seçkilərinin tarixi əhəmiyyəti olacaq".

Cənab Prezident çıxışında Azərbaycandan Azərbaycana keçiddə heç bir yoxlama olmayacağı fikrini bildirdi. Əsas məsələ budur ki, həm Naxçıvan eyni zamanda Azərbaycanın digər bölgələri arasında ermənilər çalışırdılar ki, Qarabağ məsələsi də başlayanda bu quru sərhədlər yoxa çıxsın. Bu gün artıq Zəngəzur dəhlizinin açılması, məhz həmin quru sərhəddin də, quru yolun da açılması deməkdir. 

Bu fikirləri "Operativ Məlumat Mərkəzi-OMM"-ə müsahibəsində millət vəkili Arzu Nağıyev bildirib.

Bunun ən yaxşı çıxış yolu məlum məsələdir ki, digər dövlətlərin ərazisindən deyil, birbaşa Zəngəzur dəhlizi, məhz dəhliz vasitəsilə bu yolun keçməsidir. Yəni, başqa cür ola da bilməz. Çünki bu tək Ermənistanın və yaxud digər dövlətlərin istəyi deyil, bu dünya miqyasında elə bir yoldur ki, logistik daşımalarda istər region, istərsə də digər dövlətlər üçün çox mühüm əhəmiyyət kəsb edir. Məhz buna görə də Cənab Prezidentin dediyi həmin məsələ çox mühüm məsələdir və ermənilər də bundan özləri üçün nəticə çıxarmalıdır.

“Bu, tək Azərbaycan üçün önəm kəsb etmir, hətta Ermənistanın özü tənəzzülə uğramış iqtisadiyyatını vəziyyətdən çıxarmaq üçün bu yolun açılmasında maraqlı olmalıdır”,- deyə millət vəkili bildirib.

Bir neçə gün öncə Türkiyə tərəfi də belə bir açıqlama yaydı ki, artıq müsbət siqnallar var. Ermənilər dərk edir ki, tək İran və Gürcüstan vasitəsilə çıxışlar deyil, eyni zamanda bu yol vasitəsilə onlar öz yüklərini də, eyni zamanda daşımaların da Avropaya çatdırmaq imkanına malikdirlər. Yəni həm Türkiyə sərhədinin, həm də Zəngəzur dəhlizinin açılması müsbət bir haldır. Azərbaycan daima bunun tərəfindədir. Düşünürəm ki, bu yol mütləq şəkildə açılmalıdır və açılacaqdır.

BMT-nin İqlim Dəyişikliyi üzrə Konfransının 29-cu sessiyasının (COP29) Bakıda keçirilməsi qərarı Azərbaycan üçün müasir tariximiz, diplomatik münasibətlər, qlobal təşkilatlarda təmsilçilik baxımından çox önəmli və əhəmiyyətli hadisədir.

Bu fikirləri "Operativ Məlumat Mərkəzi-OMM"-ə müsahibəsində millət vəkili Tural Gəncəliyev bildirib.

"Azərbaycan bildiyimiz kimi Şərqi Avropa qrupundan seçilmişdir. Bu kompromis əsasında Azərbaycanın namizədliyi dəstəklənmişdir. Hətta Ermənistan belə Azərbaycanın xeyrinə öz namizədliyini geri götürmüşdür və beləliklə də yekdilliklə Azərbaycanda 2024-cü il BMT-nin İqlim Dəyişikliyi ilə bağlı Konfransının 29-cu sessiyasının keçirilməsi qərara alınmışdır.

İlk dəfə olaraq Şərqi Avropa qrupunu təmsil edəcək ölkə olaraq Azərbaycan Avropa İttifaqının üzvü olmayan bir ölkə kimi bu konfransı keçirəcək. Biz bu konfransın keçirilməsi tarixinə baxsaq, Avropada İspaniya, İtaliya, Almaniya, Fransa və İngiltərə kimi ölkələrdə keçirilmişdir və həmişə də demək olar ki, Avropa İttifaqı üzvlərinin öhdəsinə düşübdür. Bu dəfə yeni bir coğrafiya MDB məkanında, Avrasiya məkanında, Türk dünyasında ilk dəfə olaraq Azərbaycanda keçiriləcək. 

Hazırkı müasir qlobal məsələlərdə iqlim dəyişikliyi, ətraf mühit məsələləri çox önəmli rol oynayır. Beynəlxalq təşkilatlar, dünya ictimaiyyəti bu məsələyə həssas yanaşır. Biz bu tədbirin keçirilməsi ilə həm bu mövzu kontekstində öz mövqeyimizi bildirəcəyik, həm də Azərbaycanın qlobal təşkilatlarda nüfuzunu artırmaq baxımından çox önəmlidir. İmicimizin gücləndirilməsi, dünyada Azərbaycanın stabil güclü bir tərəfdaş olması baxımından önəmlidir və yumuşaq güc dediyimiz alət kimi istifadə olunmalı və Azərbaycanın daha da tanıdılması, güclü bir ölkə kimi təqdim edilməsi baxımından əhəmiyyətlidir. Bu hadisə ilə bağlı 10 minlərlə insanlar bu tədbirdə iştirak etmək üçün Azərbaycana gələcəklər.

Son zamanlar Azərbaycanın əldə etdiyi uğurlu tədbirlərin, addımların siyahısına baxsaq, ölkəmiz bir neçə illər bundan öncə BMT-nin Təhlükəsizlik Şurasının qeyri-daimi üzvü seçilmişdir. Azərbaycan ilk dəfə olaraq Qoşulmama Hərəkatına sədrlik etdiyi dövrdə Qoşulmama Hərəkatının ən uğurlu və ən yaddaqalan dönəmi kimi tarixə düşdü. Nəhayət belə bir İqlim Dəyişikliyi ilə bağlı COP29-cu sessiyasının Azərbaycanda keçirilməsi çox əhəmiyyətli hadisə kimi tariximizə düşəcək".

Məlumdur ki, regionda sülhün bərqərar olması üçün humanist addımların atılması çox mühüm əhəmiyyət kəsb edir. 

Bir müddət öncə Azərbaycan Respublikası Prezidenti Administrasiyası və Ermənistan Baş Naziri Aparatı arasında danışıqlar aparıldı. Bu danışıqların nəticəsi kimi humanizm prinsiplərinə sadiqlik nümayiş etdirilərək Azərbaycan tərəfindən 32 erməni hərbçisinin, Ermənistan tərəfindən isə 2 azərbaycanlı hərbçinin azad edilməsi barədə razılıq əldə edildi. Ermənistana qaytarılması nəzərdə tutulan 32 nəfər ,hansı ki, 26 nəfəri 2020-ci ilin dekabrında Hadrut istiqamətində keçirilmiş antiterror əməliyyatları zamanı həbs edilmişdir. Qalan 6 nəfər isə müxtəlif vaxtlarda sərhədi keçərkən saxlanılmışlardır.

Bu fikirləri "Operativ Məlumat Mərkəzi-OMM"-ə müsahibəsində millət vəkili Arzu Nağıyev bildirib.

“Bunlar da artıq öz cəzalarının böyük bir hissəsini çəkiblər. 32 nəfərlik siyahıya Azərbaycan xalqına qarşı müharibə cinayətləri və bəşəriyyət əleyhinə cinayət törətmiş qondarma rejimin rəhbərləri daxil deyil və bunlar daxil olmayacaqlar. 

Eyni zamanda gələcəkdə iki ölkə arasında sülhün bərqərar olması baxımından ümumiyyətlə bu mübadilə çox böyük əhəmiyyət kəsb edir. Bizim hərbçilərə gəldikdə isə Naxçıvan tərəfindən dumanlı şəraitdə yolu azaraq Ermənistan tərəfinə keçmiş 2 Azərbaycan hərbçisini əsir götürmüş, eyni zamanda onlara qarşı bir sıra cinayətlərin törədilməsinə dair saxta ittihamlar irəli sürülmüş, qurma məhkəmələri əsasında həbs olunmuşdu. 

2020-ci il 44 Günlük Vətən Müharibəsindən, 2023-cü ilin antiterror tədbirlərindən sonra Azərbaycan ərazisində də bir qrup Ermənistan hərbçisi keçərək müəyyən cinayətlər törətməyə cəhd etmişdir. Bunun qarşısı alınaraq onlar da saxlanılmışdır. Yəni Azərbaycan və Ermənistan arasında əldə olunmuş razılığa əsasən, bu mübadilə çox mühüm əhəmiyyət kəsb edir, humanist addımdır və gələcəkdə də iki ölkə arasında sülh müqaviləsi imzalanması istiqamətində atılacaq addımlarda mühüm əhəmiyyət kəsb edəcəkdir. 

Bundan başqa xoş niyyətin təzahürü olaraq Ermənistan BMT-nin İqlim Dəyişmələri üzrə Çərçivə Konvensiyasına tərəf dövlətlərin 29-cu konfransına ev sahibliyinə öz namizədliyini geri götürdü və Azərbaycanın namizədliyini təsdiqlədi. Bu da öz növbəsində mühüm addımdır. Azərbaycan Ermənistan arasında həmçinin regionda sülhün bərqərar olunması üçün çox önəmli faktdır. 

Düşünürəm ki, həm Cənab Prezidentin bu humanist addımı bizim 2 nəfər hərbçimizin ailəsinə böyük sevinc, səadət, xoşbəxtlik gətirir. Bu dövlətimizin özünün əsgərinə qarşı, özünün zabitinə qarşı, özünün vətən keşiyində duran hər bir şəxsə qarşı atdığı humanist addımdır.

Eyni zamanda qeyd etmək lazımdır ki, bu mübadilə heç bir vasitəçi olmadan məhz Azərbaycan və Ermənistan arasında olan birbaşa danışıqlar və əlaqələr nəticəsində əldə edilib. Bu bir daha göstərir ki, regionda olması üçün vasitəçilər belə olmadan sülh müqaviləsinin imzalanması istiqamətində addımlar atmaq mümkündür. Yəni istər Avropa, istərsə də Qərb dövlətləri çalışırlar ki, bu vasitəçilik missiyasını həyata keçirərək müəyyən özləri üçün də bir vasitəçi rolundan istifadə etsinlər. Bu və ya digər şəkildə regionda aparılan siyasətə öz təsirini göstərsinlər. Lakin Azərbaycanın öz daxili və xarici siyasəti var. Birbaşa danışıqlar bunun bir təzahürüdür. Düşünürəm ki, bu istiqamətdə də mühüm addımlar atılacaqdır”.

Aminə Nəzərova