Şəbəkəyə 149 milyon istifadəçi adı və şifrə sızdı: Gmail və Facebook hədəfdə

Kiber-təhlükəsizlik üzrə analitik Ceremi Fauler şəbəkədə yüz milyonlarla istifadəçinin giriş məlumatlarını ehtiva edən müdafiəsiz bir verilənlər bazası aşkar edib. Sızdırılan məlumatlar arasında Gmail, Facebook və müxtəlif bank hesablarının loqinləri yer alır.

Tədqiqatçının hesabatına əsasən, bazada ümumilikdə 149 milyon istifadəçi adı və şifrə qeydə alınıb. Bunlardan:

• 48 milyonu Gmail hesablarına;
• 17 milyonu Facebook profillərinə;
• 420 mini isə Binance kriptovalyuta platformasına aiddir.

Mütəxəssis bazanın kimə məxsus olduğunu müəyyən edə bilməsə də, dərhal hostinq provayderinə məlumat verib və xidmət şərtlərinin pozulması səbəbindən həmin məlumat anbarı silinib. Faulerin qənaətinə görə, bu məlumatlar Infostealing tipli zərərli proqram təminatı vasitəsilə toplanıb. Bu proqramlar cihazlara yoluxaraq istifadəçilərin daxil etdiyi məlumatları (keylogging metodu ilə) qeydə alır.

Ekspertlər xəbərdarlıq edir ki, zərərli proqramların avtomatlaşdırılması nəticəsində məxfi məlumatların oğurlanması riski hər ötən gün daha da artır.