Son zamanlarda ətrafımdakı insanlarda halsızlıq, qızdırma və ishal kimi hallar müşahidə edirəm. Uşaqdan böyüyə hamı xəsətlikdən və halsızlıqdan şikayət edir. Səbəbini araşdırdıqda isə yeni virusun yayıldığını gördüm. Yeni virusun adı isə rotavirusdur. Ən çox uşaqlarda müşahidə olunsa da, böyükləridə öz qarmağına keçirə bilib.

Bəs nədir bu rotavirus? Uşaqları bu virusdan necə qorumaq olar? Özbaşına dərmanlar qəbul etmək xəstəliyi daha da ağırlaşdırırmı? 

Mövzu ilə bağlı "Operativ Məlumat Mərkəzi-OMM"-ə danışan həkim Rəna Rzayevanın sözlərinə görə, uşaqların 95 %-i rotavirus bağırsaq infeksiyasını 5 yaşına qədər keçirir:

“Qusma və diareya nəticəsində onların orqanizminin ağır susuzlaşması 6 saat ərzində baş verə bilər. Rotavirus infeksiyası mədə və bağırsaqların selikli qişasının zədələnməsilə özünü büruzə verən virus etiologiyalı infeksion patologiyadır. Südəmər körpələr və 3 yaşa qədər uşaqlar üçün xüsusilə təhlükəlidir. Belə ki, orqanizmdə hipovolemik şok verən ağır susuzluğa gətirib çıxarır”. 

Həkim deyir ki, rotavirus qastroenteriti bağırsaq infeksiyasının bir növü olub,  “reovirus” ailəsinə aid olan “rotavirus" virusu tərəfindən törədilir. Bunlardan insan üçün təhlükəli olanları isə A, B və C rotaviruslarıdır. Bu virusun əsas risk faktorları sosial-məişət durumun pis olması, süni qidalandırma, pis qidalanma, erkən doğulmuş uşaq, immun defisiti vəziyyəti (QİÇS, HİV) və digər orqan və sistemlərin ağır xəstəlikləridir.

“Rotavirus infeksiyası özünü bir neçə formada biruzə verə bilər. Məsələn, bir neçə gün ərzində öyümə, qusma, 3-7 gün ərzində ishal, qarında ağrılar, bədən temperaturunun qalxması, kəskin respirator virus infeksiyası simptomları, zəiflik, baş gicəllənməsi. Onu da qeyd edim ki, virusa qarşı istifadə edilə biləcək antibiotik və ya antiviral müalicə yoxdur. Məqsəd su və elektrolit itirilməsinin qarşısını almaqdir. Müalicə simptomatik, yəni simptomların aradan qaldırılmasına əsaslanır. Nadir hallarda rehidratasiya terapiyası məsləhər görülür”.

Doktor bildirir ki, rotavirus infeksiyasının profilaktikası məqsədilə peyvənddən istifadə edilir. Peyvənd profilaktikası uşağın ilk aylarında həyata keçirilir və 90% hallarda rotavirus infeksiyasının qarşısını alır. Rotavirus infeksiyasının ikincili profilaktikası sosial-məişət durumunu yaxşılaşdırmaqdan və su resurslarını fekal çirklənmədən qorumaqdan ibarətdir. Bundan başqa şəxsi gigiyena qaydalarına ciddi riayət etmək vacibdir. Bu məqsədlə əllər tez-tez yuyulmalı, viruslu xəstə uşaq olan evdə digər uşaqları qorumaq üçün ətrafdakı əşyalar dezinfeksiya edilməlidir.

Mövzu ilə bağlı saytımıza danışan digər müsahibimiz, həkim Ləman Qalimovanın sözlərinə görə, uşaqlar və böyüklər arasında dəniz sezonu ilə əlaqədar olaraq bəzi şikayətlər olur və qarın ağrısı, tempuraturanın yüksəlməsi, halsızlıq, boğazda ağrı və öskürək bu şikayətlərə daxildir: 

“Bu kimi şikayətlər bakterial infeksiyalarda olduğu kimi, viruslarda da özünü biruzə verə bilər. Təcrübəmzidə virus olduğu halda yanlışlıqla antibiotik istifadə edən xəstələr də var. Antibiotik istifadəsi bu xəstəlikdə heç bir dəyişiklik etmir. Çünki virus olduğu üçün antibiotik ona heçnə edə bilmir”.

Doktor deyir ki, yanlış antibiotik istifadəsi zamanı xəstələrdə ağırlaşma prosesi gedir. Həmçinin də pasient boşu-boşuna antibiotik qəbul etmiş olur. Bunun üçün də bu kimi hallarda mütləq həkimə müraciət etmək lazımdır. Müşahidə edilən virusun anti-virallar ilə müalicəsi mümkündürsə, həkim bu pereparatlardan müalicə zamanı istifadə edəcək. Çünki virus xəsəliklərdə antibiotikin yazılması doğru deyil.

Bəs bu virusun düzgün müalicəsi necə aparılmalıdır?

Mədinə Useynova

Son zamanlarda sosial şəbəkələri ələ keçirən və insanları öz toruna salan böyük bir kütlə var. Biz deyək “falçılar”, siz deyin “cadugərlar”. Verdikləri xidmət isə hər kəsə bəllidir. Bəxtaçma, bəxt bağlama, gələcəyi görmə, tarot kartları açmaq bəhanəsi ilə “ovçu” ayağına gedən və cibləri boş qalan “ovlar”…

Bəs fal və falçılıq, sehr və cadugərlik nə dərəcədə doğrudur? Dinimizdə bu terminlər varmı? Varsa, haramdırmı? Ümumiyyətlə, bu bəladan necə qurtulmaq olar? 

Mövzu ilə bağlı “Operativ Məlumat Mərkəzi-OMM”-ə açıqlama verən ilahiyyatçı Rafiq Əliyev deyir ki, insanlar əsrlər boyu bu suallara cavab axtarır, bəziləri caduya inansa da, bəziləri inanmır. Cəmiyyət də, insanlıq da, bəşəriyyət də şər və xeyir qüvvələrdən ibarətdir. Şər qüvvələrin arxasında şeytan, xeyir qüvvələrin arxasında isə yaradan – Allah dayanır. Məsələ bundadır ki, şər qüvvələr var və onlarda güclü himayədarlarına arxayın olurlar. Yəni, onları da dəstəkləyənlər var. 

“Cadu məsələsinə gəldikdə isə, o, psixoloji təsir vasitəsidir. Biz bunun kimyəvi düsturun da bilirik. Məsələn, bir qab suya yaxşı sözlər deyirsən, digər qabdakı suya pis sözlər deyirsən, sonra onun tərkibini yoxlayanda görürük ki, yaxşı sözlər deyilmiş suyun tərkibi daha faydalıdır və onu içmək sağlamlığa xeyir gətirir. Pis sözlər deyilmiş suda mənfi sözlər olduğuna görə, həmin suyun tərkibi korlanır və insan sağlamlığına ziyan vurur. Bəziləri falçıların, cadugərlərin yanına gedib deyir ki, mənim xəstəliyim var, mənim falıma bax, xeyir tapım. Onlarda yaxşı duaları və sözləri suya oxuyub, həmin suyu xəstəliyi olan insana verirlər. Xəstə insanda isə daxili inam olduğu və suyun tərkibi həmin xoş dualar və sözlər ilə dəyişdiyi üçün, bu suyu içəndə müəyyən mənada şəfa tapırlar. Yəni, uzun sözün qısası burada psixoloji amil daha böyük rol oynayır, nəyinki fizioloji amil”.

R.Əliyevin fikrincə insanlar nəyəsə inanmaq istəyir, ona görə də deyilən sözləri həqiqət hesab edirlər. İnsan bir şeyə inanırsa, inam enerjiyə çevrilir, sən inama qarışırsan, dua edirsən, bütün bunlar kainata yayılır və kainatda olan qüvvələr (şər və ya xeyir), mələklər bizim arzularımızı yerinə yetirməyə çalışır. Biz nə istəyiriksə, onlar bunu bizə vermək üçün cəhd göstərirlər. Neqativ enerji veririksə, neqativ nəticə alırıq, pozitiv enerji veririksə, pozitiv nəticə alırıq. Bu nöqteyi nəzərdən falçılar da bu formada işləyirlər. İnsanları öz dediklərinə inandırırlar, daha sonra insan öz inamı üzərində işləyib falçının istədiyini öz istəyi və arzusu ilə həyata keçirir. 

“Vaxtı ilə Məhəmməd Peyğəmbərə də cadu ediblər. Həmin cadu haqqında materiallar var. Peyğəmbər həmişə insanlara buyurub ki, cadudan uzaq olun. Çünki cadu bəşəriyyətdə var və onun yoxluğunu iddia etmək düzgün deyil. Burada da şər qüvvələrin köməyindən istifadə edib insanlara pislik etmək məqsədi güdülür. İynələr, saplar, oxunan duaların hamısı insanlara müəyyən mənada psixoloji təsir göstərir. Cadugərlər də bu əşyalara pislik etmək istədikləri adamın adını səsli oxuyur, eyni zaman da onlara hansı pislikləri etmək istədiklərini də dilə gətirirlər. Bunların hamısı enerjiyə çevrilir və enerjiyə çevirilmiş istəklər də həmin insanlara təsir göstərir. Cadu və falçı məsələlərinə bəraət qazandırılmır, amma dinimizdə deyilir ki, şər qüvvələrin olduğunu bilin, onlarda uzaq olun”.

İlahiyyatçı deyir ki, sosial şəbəkələrdən müxtəlif cürə istifadə edirlər, o cümlədən də fal, cadu məsələlərinə görə istifadə edənlər də var. İnsanların inamı o qədər sarsılıb ki, onlar inamsızlıqdan, əlacsızlıqdan falçılara inanmağı daha üstün tuturlar. Çünki kimsə onlara müəyyən ümid verir, insanlar da daxili, mənəvi rahatlıq tapır. Problem isə burdadır. Bizim ideoloji, siyasi, mədəni və maarif durumumuz daha yaxşı olsa idi, cadugərlər və falçılar cəmiyyətdə özləri üçün ciddi bir meydan aça bilməzdilər. Məsələnin əsas kökü bunlardır. Mədəni, mənəvi rahatlığı evində, işində, ailəsində tapan insan heç vaxt falçının yanına getməz. Bunu insanlar istədikləri, olduqları yerdə, xüsusi ilə cəmiyyətdə bu rahatlıqları tapmadıqlarına görə bu yollara addım atırlar. İnsanlara inam və iman lazımdır. İmanı olmayan insanlar cinlərdən və şeytanlardan da pis olur. Dinimiz isə belə insanlar ilə yaxın olmağı insanlara məsləhət görmür. İman da fərdidir. Dində məcburiyyət də yoxdur. Odur ki, sosial şəbəkələr insanları yolundan çıxaran platformaya çevirilib.

Digər müsahibimiz ilahiyyatçı Ağa Hacıbəyli saytımıza açıqlaması zamanı bildirib ki, falçılıq, cadu terminlərinin İslamda ümumi adı sehrdir:

“Ən qədim tarixdən insanlar bu fəlakəti fərqli formalarda icra ediblər. Qurani-Kərim məsələyə sehr olaraq baxır. Bəli, sehr deyilən bir şey var. İnsan psixologiyasına, zehninə, qəlbinə, ruhuna fərqli şəkildə, telepatik olaraq təsir etmə qabiliyyəti olan insanlar var. Bu insanlar isə cəmiyyətdə çox nadir və azdılar. Bununla bağlı dərs almaq üçün xüsusi elmi mərkəzlər də yoxdur”.

İlahiyyatçı deyir ki, dinimizcə bu məsələ haram və yasaqdır. Qaynaqlarda Peyğəmbərimizə cadu edildiyi iddia edilsə də, ona sehr edə bilməyiblər. Buna təşəbbüs etsələr də, alınmayıb. Dəfələrlə ona müxtəlif şəkildə zərər vurmağa çalışıblar, amma hər həmlədə Allah öz Rəsulunu müdafiə edib, qoruyub və ümmətin də qorunma yollarını öyrədib. Falçılığın bu gün bir çox formaları yayılıb, ümid tacirləri də yayılan hər bir formadan yararlanıb, istifadə edir:

“Sosial medianın da ayaq açdığı dövr belə insanlar üçün böyük fürsət yaradır. Onlar da bir qrup insanları cəmiyyətin içərsində aldada biliblər. Bu falçıların ən böyük iddiaları gələcəkdən xəbər vermələridir. İnsanların da ən böyük arzusu gələcəkdə baş verəcək hadisələri öyrənmək istəmələridir. Bu ümid tacirləri belə insanlardan istifadə eləməyə çalışırlar. Bu isə batil inancdır, haramdır və doğru bir yol deyil. Biz bunu şiddətlə qınayırıq. Falçılıq göydən yerə endirilən bütün dəyərləri təkzib etmək mənasına gəlir. Tövsiyyəm odur ki, XXI-ci əsrdə insanlar belə saxtakar şəxslərin verdikləri vədlərə inanmasınlar”.

Azərbaycanın apardığı daxili və xarici siyasət dünyanın aparıcı dövlətlərinin diqqətini cəlb edir.

Bunu "Operativ Məlumat Mərkəzi-OMM"-ə açıqlamasında millət vəkili Aydın Mirzəzadə dedi.

O qeyd etdi ki, bu gün Azərbaycanla birgə fəaliyyət göstərmək istəyən ölkələrin sayı durmadan artır.

"Azərbaycanın ənənəvi dost olduğu ölkələr var. Bunlar Türkiyə, Pakistan, Səudiyyə Ərəbistanı, Gürcüstan, Avropa və Asiyada olan ölkələrdir. Azərbaycanın yaxşı münasibətlərdə olduğu ölkələrdən biri də İtaliyadır. İtaliya 44 Günlük Vətən Müharibəsində Azərbaycanın ədalətli mövqeyini dəstəklədi. İtaliya bu gün işğaldan azad olunmuş ərazilərin bərpasına kömək edir".

Deputat vurğuladı ki, Prezident İlham Əliyevin İtaliyaya səfəri Azərbaycanın beynəlxalq aləmdə nüfuzunun göstəricisidir.  

"İtaliya Avropa və dünya siyasətində çox ciddi nüfuzlu ölkələrdəndir. İtaliyanın Azərbaycan ilə birgə fəaliyyət göstərməsi, Azərbaycanın imkanlarından istifadə etməsi ölkəmizin qazandığı münasibətlərdir. Azərbaycanın bu gün beynəlxalq aləmdəki rolu, öz dövlət müstəqilliyini qətiyyətlə qoruması bir çox məsələlərdə, o cümlədən Prezident İlham Əliyevin İtaliyaya səfərində özünü bariz göstərdi", - deyə o sonlandırdı.

Digər müsahibimiz millət vəkili Məlahət İbrahimqızı isə bildirdi ki, Romada Azərbaycan ilə İtaliya arasında imzalanmış sənədlərin Azərbaycan Respublikasının Prezidenti İlham Əliyevin və İtaliya Respublikası Nazirlər Şurasının sədri Ciorcia Meloninin iştirakı ilə mübadiləsi mərasiminin keçirilməsi münasibətlərin bundan sonrakı inkişafında yeni bir mərhələnin başlanğıcı hesab edilir.

"Hazırda Azərbaycan və İtaliya arasında əlaqələr strateji tərəfdaşlıq səviyyəsinə yüksəlib. İtaliya Avropa İttifaqının üzv ölkələri arasında Azərbaycanın əsas siyasi, iqtisadi və ticarət tərəfdaşıdır. Həmçinin İtaliya Avropada Azərbaycanın birinci ticarət və ixracat tərəfdaşıdır. İki ölkə arasında mədəniyyət və humanitar sahələrdə əməkdaşlıq yüksələn xətlə inkişaf edir. Sözsüz ki, iki ölkə arasında əlaqələr bundan sonra da yüksələn xəttlə inkişaf edəcək".

Deputat Vüqar İskəndərov isə vurğuladı ki, Azərbaycan dünya arenasında nüfuza malik olan bir dövlətdir. Azərbaycanın bir çox Avropa ölkəsi ilə ikitərəfli münasibətləri yüksək səviyyədə inkişaf edir.

"Neft-qaz siyasəti ilə ölkəmiz ixracatçı kimi bir çox ölkələrə töhfə verir. Birinci yerdə isə İtaliyadır. İtaliya ilə Azərbaycan arasındakı münasibətlər yüksələn xətlə inkişaf edir. Prezidentin səfəri, keçirdiyi görüşlər və səsləndirdiyi fikirlər onu deməyə əsas verir ki, iki ölkə arasındakı münasibətlər bundan sonra da inkişaf edəcək. İtaliya ən böyük ticarət tərəfdaşlarımızdan biridir. İtaliya Azərbaycan qazının Avropaya şaxələndirilməsində çox önəmli rol oynayır. Bu səfər iki ölkə arasındakı münasibətlərə təkan verəcək".

Mehman Mirzəzadə

Ermənistanda “Henaket” analitik mərkəzinin rəhbəri, hərbi ekspert Vitali Manqasaryan iddia edir ki, Azərbaycan anklavlarının (Kərki, Sofulu, Bərxudarlı, Yuxarı Əskipara – red.) qaytarılmasına hazırlıq gedir. O qeyd edib ki, 4 kəndin Azərbaycana təhvil verilməsi tezliklə baş tutacaq.

Bunu "Operativ Məlumat Mərkəzi-OMM"-ə açıqlamasında politoloq Turan Rzayev bildirib.

"Aydın məsələdir ki, V.Manqasaryan məsələni öz ampluasında dəyərləndirir. Yəni onun iddiası geosiyasi və regional reallıqlarla üst-üstə düşmür. Məsələ ondadır ki, Qazaxın 4 qeyri-anklav kəndi delimitasiya və demarkasiya prosesi çərçivəsində dinc yolla Azərbaycana qaytarıldı. Bu nailiyyət, ikili danışıqlar və sərhəd komissiyalarının görüşü fonunda baş tutdu. Yəni mübahisəli məqamlar diplomatik yolla həll edilərkən hərbi varianta əl atmaq Bakının maraqlarına uyğun deyil.

Azərbaycanla Ermənistan arasında mübahisəli məqamlar var. Onlardan biri də Kərki, Sofulu, Bərxudarlı və Yuxarı Əskipara kəndlərinin aqibətidir. Tərəflər arasında mübahisəli məsələ müzakirə edilsə də, hələlik bunun prioritet məsələ olduğunu düşünmürəm. Azərbaycan üçün daha önəmli məsələ Ermənistan konstitusiyasının və müstəqillik haqqında bəyannamənin ərazi iddiaları ehtiva edən və sülhə hüquqi maneə olacaq hissələrin dəyişdirilməsidir. Bu məsələ həll edilsə, İrəvanla Bakı arasında sülhə nail olmaq olar".

Politoloq deyir ki, Azərbaycan ilkin sülh müqaviləsi önündə başlıca maneə olan bu məsələni həll edib, anklavların taleyinə qayıtmaq istəyir. Bu zaman prosesin hansı metod və ya beynəlxalq təcrübə əsasında tənzimlənəcəyi müəyyən ediləcək. Aydın məsələdir ki, qeyri-anklav kəndlərdən fərqli olaraq anklav kəndlərin geri qaytarılması məsələsi eynilik təşkil etmir. Yəni bu proses ya qarşılıqlı razılıq, ya da beynəlxalq təcrübəyə müraciətlə tənzimlənə bilər.

"V.Manqasaryan Azərbaycanın əsas məqsədlərindən birinin Ermənistan ordusunun silahsızlaşdırılması olduğunu iddia edib. Azərbaycanın belə bir məqsədinin olduğunu düşünmürəm. Bu kimi hallar ölkə işğalında baş verir. Misal üçün İkinci Dünya müharibəsinin sonunda Almaniya və Yaponiyanın konstitusiyalarında dəyişiklik oldu və orduları müəyyən həddə qədər məhdudlaşdırıldı. Azərbaycanla Ermənistan arasında mövcud reallıqlar fonunda Bakının belə təklifi yoxdur.

Bununla belə, Ermənistanın regiona kənar gücləri gətirməsi, sərhəddə Aİ sülhməramlı missiyasının fəaliyyəti Bakını narahat edir. Bu istiqamətdə müəyyən tələblər sülh gündəliyinə salına bilər", - deyə o bildirib.

Öz ermənipərəst mövqeyi ilə tanınan Konstantin Zatulin növbəti dəfə anti-Azərbaycan mövqeyini nümayiş etdirib, terrora və separatizmə dəstək sərgiləyib. 

Rusiya Dövlət Dumasının MDB işləri üzrə komitəsinin sədr müavini olan Zatulin bu dəfə qondarma rejimin yaradılmasının ildönümü ilə bağlı Qarabağ separatçılarına təbrik ünvanlayıb. O, Bako Saakyan, Arkadi Qukasyan, Ruben Vardanyan və digər terrorçu-separatçılara dəstək nümayiş etdirərək, “Allahdan arzu edirəm ki, onların başına bir iş gəlməsin və tez bir zamanda ailələrinə, Ermənistana qayıtsınlar”, - deyib.

Polad Bülbüloğlu Dövlət Dumasının MDB işləri üzrə komitəsinin sədr müavini Konstantin Zatulinin təxribatçı bəyanatları ilə bağlı Rusiya Dövlət Dumasının sədri Vyaçeslav Volodinə məktub göndərib.

Rusiya Dövlət Duması nümayəndəsinin bu cür açıqlaması necə dəyərləndirilməlidir? Zatulinin bu fikirlərini rəsmi Moskvanın mövqeyi hesab etmək olarmı? 

Mövzu ilə bağlı "Operativ Məlumat Mərkəzi-OMM"-ə açıqlama verən politoloq Xaqani Cəfərlinin sözlərinə görə, Konstantin Zatulinin ermənipərəstliyi onun imperiyaçı olmasından irəli gəlir:

“Hələ 1997-ci ildə Andranik Miqranyanla birlikdə yazdığı və 1997-ci ilin martında “Nezavisimaya qazeta”da dərc olunmuş “MDB: tarixin başlanğıcı və ya sonu. Mərhələləri dəyişmək” başlıqlı məqaləsində Rusiyanın postsovet məkanı üzərində nəzarəti saxlamasının ideoloji əsasları və bu vəzifəni həyata keçirməyin yolları göstərilmişdi. Məqalənin ümumi fikri ondan ibarətdir ki, Rusiya postsovet məkanını özünün təsir dairəsində saxlamaq üçün bütün imkanlara əl atmalı, o cümlədən, münaqişələr yaratmalı və onları idarə etməlidir. Həmin məqalədə müəlliflər yazırdılar ki, 1994-cü ilin sonundan etibarən Rusiya diplomatiyası üçün yeni problem yaranıb. Çünki regionda vəziyyət kökündən dəyişib. 1994-cü il sentyabrın 20-də Qərb şirkətlərinin iştirakı ilə təxminən 7,5 milyard dollar kapital qoyuluşu ilə Xəzər neftinin hasilatı üzrə ilk super-layihə imzalandı. Müəlliflər baş vermiş hadisəni rus diplomatiyası üçqat məğlubiyyəti adlandırmışdılar”. 

Politoloq deyir ki, Zatulinin ermənipərəstliyi Azərbaycana nifrətindən irəli gəlir. 

Rusiyanın hakim dairələrində Zatulinlə eyni mövqedə çoxlu siyasətçilər var. Rusiya xarici işlər naziri Sergey Lavrov da onlardan, Zatulinlə çox yaxın münasibətləri olan biridir. Əgər Rusiyanın əvvəlki gücü olsaydı onlar separatçıların azadlığına nail ola bilərdilər. Bəxtimiz onda gətirib ki, Ukrayna Rusiya imperiyasının dişlərini töküb. O daha əvvəlki kimi öldürücü gücə malik deyil. Ancaq bununla belə Zatulinin təsir gücünü görməzdən gəlmək olmaz. Azərbaycan cəmiyyəti Rusiyadan gələ biləcək basqılara qarşı Azərbaycan hakimiyyətinin güzəştə getməməsi üçün Zatulin və onun kimlərinin çıxışlarına qarşı etiraz səsini ucaltmalıdır.

Digər müsahibimiz politoloq Tural İsmayılov isə saytımıza açıqlaması zamanı deyir ki, Kanstantin Zatulin ədalət meyarlarını itirmiş, ifrat şəkildə nə öz mövqeyi, nə də yanaşması ilə Rusiyaya xeyir gətirməyən adamdır:

“Rusiya hələ də Zatulinin Rusiya Dövlət Dumasındakı MDB ölkələri ilə iş üzrə sədr müavinliyi vəzifəsini davam etdirir. Bu tamamilə erməni maraqlarının oyunçusuna çevrilib. O, birbaşa erməni təşkilatları ilə işləyir, onların əl altısına çevrilib və bütün bunları özünə rəva bilir”. 

Politoloqun fikrincə, məsələnin digər tərəfi ondan ibarətdir ki, Zatulin bu dəfə tamamilə həddini aşdı, qondarma qurumu təbrik etdi. O, öz fikirlərində Azərbaycanın ərazi iddialarına qəsd edib, bunu dilə gətirdi. Bu isə Azərbaycan-Ermənistan münasibətlərinin bugünki ruhuna ziddir. Putinin bu yaxınlarda Azərbaycana iki günlük səfəri oldu. Azərbaycan-Rusiya münasibətlərinin inkişaf etməsi isə göz önündə olan məsələdir.

"Bunlara rəğmən Zatulin insanlıq meyarlarını itirib, Azərbaycan əleyhinə təbliğatın ruporuna çevirilib. Rusiya Dövlət Dumasının kəskin şəkildə bu məsələnin qarşısının kəsməməsi suallar yaradır. Kimsə deyə bilər ki, bu, Zatulinin mövqeyidir, Rusiya Dövlət Dumasının deyil. Eyni zamanda da Zatulin Rusiya Dövlət Dumasının üzvüdür. Ona görə də Rusiya Zatulinin təxribatçı fikirlərinə görə Azərbaycana açıqlama verilməlidir.

Mədinə Useynova

Azərbaycan-İtaliya münasibətləri Azərbaycan müstəqil dövlət olandan bəri dinamik inkişaf etmişdir. Müxtəlif sahələrdə çox ciddi əlaqələrimiz var. Azərbaycanda böyük İtaliya şirkətlərinin fəaliyyəti daim təqdirəlayiq qəbul olunur. Əsas məqam ondan ibarətdir ki, istər neft sahəsində, istər bərpa olunan enerji sahəsində, istərsə də digər istiqamətlərdə iqtisadiyyatın şaxələnmiş formasında bizim İtaliya ilə çox ciddi münasibətlərimiz var.

Bunu "Operativ Məlumat Mərkəzi-OMM"-ə açıqlamasında millət vəkili Arzu Nağıyev bildirib. O qeyd edib ki, Prezident İlham Əliyevin məhz İtaliyaya işgüzar səfəri və məhz böyük şirkətlərin rəhbərləri ilə keçirdiyi görüşlər bir daha göstərir ki, Avropa Birliyinə daxil olan ən mühüm dövlətlərdən biri olan İtaliya Azərbaycanla münasibətləri dostluq münasibətləridir, eyni zamanda Avropanın enerji təhlükəsizliyinə təhdidin qarşısını ala biləcək dövlət kimi daima Azərbaycanı qəbul edir.

A.Nağıyev vurğulayıb ki, məhz bu səfərdən sonra Azərbaycan-İtaliya münasibətləri daha da müsbət istiqamətdə inkişaf edəcəkdir.

“İtaliya Avropa Birliyinə daxil olmaqla bərabər, Azərbaycanı beynəlxalq səviyyədə dəstəkləyən mühüm dövlətlərdən biridir və Azərbaycan da İtaliyanı belə qəbul edir. Buna görə də məhz Azərbaycan-İtaliya münasibətləri daima inkişaf edib”, - deyə millət vəkili qeyd edib.

Digər müsahibimiz, millət vəkili Fazil Mustafa deyir ki, İtaliya heç vaxt Almaniya və Fransa kimi bəzi məsələlərdə Azərbaycan əleyhinə kampaniyalarda iştirak etməyi nəzərdə tutmur və Azərbaycanın da ən çox neft ixracını həyata keçirdiyi ölkələrdən biridir.

“Eyni zamanda, bizim mədəni əlaqələrimiz də genişdir. İtaliya da bunu hər zaman diqqətdə saxlayır. Prezident İlham Əliyevin İtaliyaya səfəri Avropa Birliyinin ən önəmli ölkələrindən biri ilə ikitərəfli əməkdaşlıq baxımından olduqca vacib istiqaməti nəzərdə tutur. Çünki Avropa Birliyi içərisində İtaliyanın təsir imkanları kifayət qədər genişdirBiz də bu əlaqələri daha da genişləndirmək xəttini götürmüşük.

Prezidentin də ikitərəfli əməkdaşlıq istiqamətində çalışmaları yəqin ki, öz bəhrəsini verəcəkdir. Çünki İtaliya elə bir ölkədir ki, burada müəyyən parametrlərlə müstəqil siyasi kurs izləmə ənənəsi güclüdür

Bu baxımdan da, ölkə prezidentinin bu səfərini əlaqələrin inkişafından başqa, həm də Avropada Azərbaycanla bağlı siyasətin parametrlərinin yaxşıya doğru dəyişməsi üçün vacib və mühüm əhəmiyyət daşıyır”, - deyə deputat vurğulayıb.

Aminə Nəzərova