“Zirə”nin baş məşqçisi Rəşad Sadıqov Azərbaycan Premyer Liqasının 20-ci turu çərçivəsində “Neftçi”yə qarşı keçirdikləri oyun haqda (0:1) danışıb.
"Operativ Məlumat Mərkəzi - OMM" xəbər verir ki, o, matçdan sonra keçirilən mətbuat konfransında aşağıdakı fikirləri səsləndirib:
“Oyun planlaşdırdığımız keçdi. Pressinq etmək əsas planlarımızdan biri idi. Oyun nəzarətimizdə keçdi. Korner rəqibin üstünlüklərindən biridir. Azlıqda qaldıqdan sonra da hücumlarımız oldu. “Neftçi”ni qələbə münasibətilə təbrik edirəm.
Əgər epizod sarı vərəqlikdirsə, buna görə hakim VAR-a çağırılmır. VAR-da gündə bir qərar çıxır. Bəlkə də belə qərar var, biz bilmirik? Bilmirəm. VAR-la bağlı çox suallar, qaydalar var.
Bu gün hər iki komandanın müəyyən potensialı var idi. Bizim hədəfimiz Konfrans Liqasına qatılmaqdır. “Qarabağ”, “Neftçi” böyük komandalardır. Əsas məqsəd dördlüyə qatılmaqdır. Biz risk etməyə məcburuq. Oyundan qabaq qələbəyə köklənmişdik. Amma olmadı. Dördüncü yeri qoruyub saxlamalıyıq. “Sumqayıt”la oyunda da, bu matçda da komandamdan razı qaldım. Balanslaşdırılmış oyun gedirdi. Korner vasitəsilə rəqib fərqləndi. Yolumuza davam edirik. Gələn il komandamız rəqabətə daha da hazırlıqlı olacaq. Üçlüyə düşmək asan deyil.
Ehtiyatsızlıq ucbatından qırmızı vərəqə aldıq. Bu epizod nizam-intizamla bağlı deyildi. Digər epizodlarda birə-bir mübarizə gedirdi. Bir çox oyunlarda azlıqda qalırıq. Bu məni üzür. Buna baxmayaraq, komandam bu hallarda da sona qədər mübarizə aparır.
Ofsayt epizodundan sonra nə üçün hakimin VAR-a çağırıldığını bilmirəm”.