Rod-Aylend və Massaçusets ştatlarının bəzi bölgələrində qar örtüyünün hündürlüyü 94 santimetrə çatıb.
“Operativ Məlumat Mərkəzi-OMM” xəbər verir ki, bu barədə ABŞ-nin Milli Hava Proqnozları Xidməti məlumat yayıb.
Nyu-Yorkun məşhur "Central Park" ərazisində 48 santimetrdən çox qar ölçüldüyü halda, Rod-Aylendin paytaxtı Providens şəhəri 91 santimetrlik göstərici ilə 1978-ci ildən bəri ən yüksək yağıntı rekordunu yeniləyib.
Güclü fırtına infrastrukturda ciddi fəsadlar törədib. Nyu-York, Nyu-Cersi və Massaçusets başda olmaqla, ölkənin şərq sahilində 600 mindən çox ev və iş yeri işıqsız qalıb.
Massaçusets qubernatoru Maura Healey ştatın cənub-şərqində zəruri olmayan bütün hərəkətlərə qadağa qoyub və magistral yollarda sürət həddini saatda 25 kilometrə endirib.
Nyu-Yorkda tətbiq edilən səyahət qadağası isə meqapolisi sanki xəyalət şəhərə çevirib. Bənzər məhdudiyyətlər Rod-Aylend və Konnektikut ştatlarında da qüvvəyə minib.
Hava nəqliyyatı fırtınadan ən çox zərər çəkən sahə olub. "FlightAware" portalının məlumatına görə, ABŞ ilə əlaqəli 5 706 uçuş tamamilə ləğv edilib.
Nyu-Yorkun "LaGuardia" hava limanında reyslərin 98%-i təxirə salınıb; "JFK" hava limanında uçuşların 91%-i reallaşmayıb. Bostonun "Logan International Airport" limanında isə reyslərin 92%-i ləğv olunub.
Sinoptiklər əlverişsiz hava şəraitinin davam edəcəyini və növbəti günlərdə də minlərlə uçuşun təxirə salınacağını proqnozlaşdırırlar. Hazırda bölgədə qarın təmizlənməsi və fəsadların aradan qaldırılması istiqamətində işlər davam etdirilir.
