OMM Redaksiyası
Oktyabrın 3-də, şənbə günü səhər saatlarında Qəzza şəhərində yaşayış binasına endirilən İsrail hava zərbəsi nəticəsində azı beş fələstinli həlak olub. Səhiyyə və mülki müdafiə qurumlarının rəsmiləri ölənlərdən dördünün qadın olduğunu bildiriblər.
Həlak olanlar arasında xristian ana Maisa Əbu Davud və onun qızı Meri də var. Tibb işçiləri və kilsə onların ölümünü təsdiqləyib. Zərbə binanı dağıdıb və yanğına səbəb olub. İsrail ordusu hadisə ilə bağlı dərhal açıqlama verməyib.
Şahidlərin dedikləri
Şahid Əhməd Əl-Dahduh hadisə vaxtı ailəsinin yatdığını deyib: “Yatmışdıq, qəfildən ardıcıl zərbələr və güclü partlayışlar eşitdik. Uşaqlar qorxudan oyandılar, qaçmağa və qışqırmağa başladılar”.
İsrail HƏMAS-ın yenidən silahlandığını və atəşkəsi pozaraq hücumlar həyata keçirdiyini bildirir. Son həftələrdə qruplaşmaya qarşı zərbələri artıran İsrailin bu iddialarını HƏMAS rədd edir. Qruplaşma İsraili Qəzza üzrə sülh razılaşmasını pozmaqda ittiham edir.
Dəfn mərasimi və atəşkəsin vəziyyəti
Qəzza şəhərindəki Müqəddəs Porfiri kilsəsində xristian ana və qızın dəfn mərasiminə müsəlman dostları, yaxınları və qohumları qatılıblar. Qəzzanın iki milyondan çox əhalisinin təxminən bir faizi xristiandır.
“Bu gün, mahiyyət etibarilə, həyatımın ən pis günüdür. Bu gün anamı və nənəmi itirdim”, – Fuad Əl-Nəccar bildirib. Şənbə günü daha sonra Qüdsün Yunan Pravoslav Patriarxlığı Maisa Əbu Davud və qızı Merinin vəfatı ilə bağlı başsağlığı verib.
ABŞ-ın vasitəçiliyi ilə ötən il əldə olunan Qəzza atəşkəsi razılaşması ərazinin gələcəkdə yenidən qurulmasını nəzərdə tutur. Lakin HƏMAS-ın tərksilahı və İsrail qoşunlarının çıxarılmasını da əhatə edən münaqişəyə son qoymaq planının icrasında indiyədək az irəliləyiş əldə olunub.
Qəzzanın səhiyyə rəsmilərinin hesablamasına görə, ötən ilin oktyabrında atəşkəs qüvvəyə mindikdən sonra İsrail atəşi nəticəsində azı 1 400 fələstinli həlak olub. İsrail isə həmin müddətdə Qəzzada silahlı şəxslərin dörd hərbçisini öldürdüyünü bildirir.
