Rusiya Prezidenti Vladimir Putin Kremldə Kubanın xarici işlər naziri Bruno Rodriqes ilə görüşüb.
“Operativ Məlumat Mərkəzi-OMM” xəbər verir ki, görüş zamanı Rusiya lideri kommunist rejimi tərəfindən idarə olunan adaya qarşı tətbiq edilən yeni sanksiyaların qəbulolunmaz olduğunu vurğulayıb.
Putin Rusiyanın hər zaman Kubanın yanında olduğunu və Moskvanın bu məsələdə mövqeyinin "aydın və birmənalı" olduğunu qeyd edib.
Hazırda Kuba yanacaq tədarükünün kəsilməsi səbəbindən ağır enerji böhranı ilə üz-üzədir.
Rusiya tərəfi Havanaya neft çatışmazlığını aradan qaldırmaq üçün maddi və texniki yardım göstərəcəyini bəyan edib.
Eyni zamanda, Rusiyanın xarici işlər naziri Sergey Lavrov ABŞ-ni tam dəniz blokadasına əl atmamağa çağıraraq, məsələnin danışıqlar yolu ilə həllini təklif edib.
ABŞ Prezidenti Donald Tramp isə məhdudiyyətləri müdafiə edərək Kubanı "uğursuz dövlət" adlandırıb və Havana rəhbərliyini rəsmi Vaşinqtonla razılığa gəlməyə çağırıb. Kuba Prezidenti Migel Dias-Kanel isə dialoqa hazır olduqlarını, lakin bunun yalnız bərabərhüquqlu və suverenliyə hörmət çərçivəsində mümkün olduğunu bildirib.
Xatırladaq ki, ABŞ-nin Kubaya qarşı ticarət embarqosu 1960-cı ildən bəri davam edir. Son dövrlərdə Venesuela və Meksikanın təzyiqlər altında yanacaq tədarükünü dayandırması adadakı vəziyyəti kritik həddə çatdırıb.
