İran İslam Respublikasının Prezidenti Məsud Pezeşkian bəyan edib ki, İslam İnqilabının lideri Ayətullah Seyid Əli Xamenei İran və İraq xalqları, eləcə də iki ölkə arasında qardaşlıq münasibətlərinin qorunmasına hər zaman xüsusi önəm verib.
“Operativ Məlumat Mərkəzi-OMM” xəbər verir ki, dövlət başçısı İran və İraq arasında əlaqələrin yalnız siyasi əməkdaşlıqla məhdudlaşmadığını, eyni zamanda ortaq tarixi, dini və mənəvi dəyərlərə söykəndiyini bildirib.
Məsud Pezeşkian qeyd edib ki, rəsmi Tehran və Bağdad arasında mövcud münasibətlər strateji xarakter daşıyır.
Onun sözlərinə görə, Ayətullah Seyid Əli Xameneinin tövsiyələri iki qonşu ölkə arasında əməkdaşlığın daha da möhkəmləndirilməsi və əlaqələrin inkişafı üçün mühüm əsas rolunu oynayır.
Prezident bildirib ki, İran rəhbərliyi İraqla münasibətləri regionda sabitliyin və təhlükəsizliyin təmin edilməsində əsas amillərdən biri hesab edir.
Pezeşkian vurğulayıb ki, İran və İraq arasında qardaşlıq münasibətlərinin inkişafı hər iki dövlətin milli maraqlarına xidmət edir və bu əməkdaşlığın gələcəkdə də genişləndirilməsi nəzərdə tutulur.
