OMM Redaksiyası
Ermənistanın baş naziri Nikol Paşinyan qonşu ölkələrlə ekoloji əməkdaşlığın inkişafı üçün biomüxtəlifliyin qorunmasının əhəmiyyətini vurğulayıb. O, İrəvanda keçiriləcək COP17 biomüxtəliflik sammitinin 30 ildən artıq davam edən Azərbaycan-Ermənistan münaqişəsindən sonra regional əməkdaşlıq imkanları yaratdığını deyib.
Paşinyan COP17 öncəsi liderlərin sammitindəki müzakirə zamanı münaqişənin biomüxtəlifliyə təsirinin Ermənistan üçün aydın olduğunu bildirib.
Onun sözlərinə görə, münaqişə və ardınca baş verən enerji böhranı Ermənistanın təbiətinə ciddi zərər vurub: minlərlə hektar meşə qırılıb, geniş yayılmış qanunsuz ov isə Sevan gölündə balıq ehtiyatlarını tükənmə həddinə çatdırıb.
Paşinyan sərhədlər boyunca hərbi istehkamların əsasən plansız tikintisinin təbii yaşayış mühitlərinə ziyan vurduğunu və biomüxtəliflik üçün əlavə təhlükələr yaratdığını da qeyd edib. Müdafiə ehtiyacları səbəbindən meşələrin qırıldığını, hərbi infrastrukturun ekosistemləri pozduğunu, minaların isə partlayışlar nəticəsində vəhşi təbiətə ciddi təhlükə yaratdığını deyib.
Baş nazir silahlı münaqişələrin ətraf mühitə vurduğu zərərin dövlət sərhədlərini aşdığını və qonşu ölkələrin təbiətin qorunması sahəsində birgə işləmək imkanlarını azaltdığını vurğulayıb.
Azərbaycanla münasibətlərin gələcəyinə toxunan Paşinyan bildirib ki, tərəflərin ilkin razılığa gəldiyi sülh sazişi ratifikasiya edildikdən sonra ətraf mühit məsələləri daha geniş şəkildə gündəmə gətirilə bilər.
“Ekoloji məsələlər sülh prosesinin bir hissəsidir. Azərbaycanla ilkin razılaşdırılmış sülh sazişi ratifikasiya edildikdən sonra ətraf mühit məsələləri daha geniş müzakirə olunacaq”, – Paşinyan deyib.
Onun sözlərinə görə, ortaq su ehtiyatlarının idarə olunması və biomüxtəlifliyin qorunması istiqamətində birgə səyləri nəzərdən keçirmək üçün artıq müzakirələr aparılır. Paşinyan bir ölkədə başlayıb digərinin ərazisindən keçən çayların olduğunu xatırladaraq, biomüxtəlifliyin ölkələri birləşdirdiyini və bu sahədə əməkdaşlıq üçün böyük imkanların mövcudluğunu bildirib.
