Ermənistanın hüquq-mühafizə orqanları digər ölkələrin maraqları naminə fəaliyyət göstərən şəxslərin kifayət qədər böyük siyahısına malikdir.
"Report" Ermənistan mediasına istinadən xəbər verir ki, bunu Ermənistanın Baş naziri Nikol Paşinyan brifinqdə bəyan edib.
Baş nazir qeyd edib ki, əgər bu insanlar hələ də azadlıqdadırsa, bu o deməkdir ki, "onlar casusluğun başladığı xətti hələ keçməyiblər, lakin bu məntiq çərçivəsində fəaliyyət göstərirlər".
"Elə insanlar var ki, bu xəttə çox yaxındırlar, onun kənarında gəzirlər. Xətti keçdikləri zaman cavab reaksiyası olacaq. Məndə bu insanların ad-soyadları, əlaqə məlumatlarının yer aldığı siyahısı var. Mən ilk növbədə, siyasi xadimlərdən danışıram", - Paşinyan vurğulayıb.
