OMM Redaksiyası
Papa XIV Leo oktyabrın 10-da ölüm cəzasını yenidən pisləyib. O, edamın insan həyatının müqəddəsliyini pozduğunu və insanlara xilas olmaq imkanı vermədiyini bildirib.
ABŞ ordusu 2009-cu ildə Fort-Hudda 13 nəfəri öldürməkdə təqsirli bilinən, keçmiş hərbi psixiatr Nidal Həsəni güllələnmə ilə edam etməyi planlaşdırır. Müdafiə naziri Pit Heqset cümə axşamı edamın canlı yayımlanacağını açıqlayıb. Bu baş tutarsa, ABŞ-da edamın yayımlanması ilk belə hal olacaq.
“Ümumi rifah ölüm cəzasına əl atmadan qoruna, ədalətin tələbləri yerinə yetirilə bilər”, – ABŞ-da doğulan ilk papa XIV Leo Ölüm Cəzasına Qarşı Ümumdünya Günü münasibətilə sosial şəbəkədə yazıb. O, Pentaqonun canlı yayım planına birbaşa toxunmadan, ölüm cəzasının “insanın toxunulmazlığına və ləyaqətinə hücum olduğu üçün qəbuledilməz” olduğunu qeyd edib.
Həsənin 1945-ci ildən bəri ABŞ ordusu tərəfindən güllələnmə ilə edam edilən ilk şəxs olacağı gözlənilir. Heqsetin dəstəklədiyi canlı yayım planına prezident Donald Trampın Respublikaçılar Partiyasından olan bəzi qanunvericilər, dini liderlər və beynəlxalq müşahidəçilər etiraz ediblər.
Tramp yayımın həyata keçirilməsinə icazə verib-verməyəcəyinə hələ qərar vermədiyini deyib. Katolik olan vitse-prezident Cey Di Vens də Pentaqonun planı icra edib-etməyəcəyinə şübhə ilə yanaşıb. Həsənin edamı dekabrın 3-nə planlaşdırılıb. Vens yayım baş tutsa, ona baxmayacağını bildirib.
Plan ABŞ-da ölüm cəzası ilə bağlı müzakirələrin yenidən gücləndiyi vaxta təsadüf edir. Buna ötən həftə Tennessi ştatında bir qadının ölümcül inyeksiya ilə edamı zamanı baş verən uğursuz cəhd də səbəb olub.
