OMM Redaksiyası
Pakistan Əfqanıstanın Taliban hakimiyyətini ölkə ərazisindən fəaliyyət göstərən silahlı qruplara qarşı tədbir görməyə çağırıb. İslamabadın bəyanatına görə, sərhədyanı hücumlar regional təhlükəsizlik üçün artan təhdid yaradır.
Pakistanın baş nazirinin müavini və xarici işlər naziri İşaq Dar oktyabrın 12-də bildirib ki, Pakistana hücumlar Əfqanıstan ərazisində planlaşdırılır və oradan həyata keçirilir, hücum edənlər isə sonradan sərhədin o tayındakı sığınacaqlara çəkilirlər.
“Əfqanıstandan qaynaqlanan davamlı terror təhdidini artıq görməzdən gələ bilmərik”, – Dar deyib. O, beynəlxalq tərəfdaşları Taliban hakimiyyətini terrorla mübarizə öhdəliklərini yerinə yetirməyə çağırmağa səsləyib.
Darın sözlərinə görə, Əfqanıstandan Pakistana hücum edən silahlı qruplar başqa ölkələr üçün də təhlükə yarada bilər. Nazir beynəlxalq əməkdaşlığın gücləndirilməsini istəyərək regional təhlükəsizlik təhdidi ilə mübarizədə Pakistanın tək qalmamalı olduğunu vurğulayıb.
Pakistan BMT hesabatına istinad edir
Pakistanın İnformasiya və Yayım Nazirliyi oktyabrın 12-də “X” platformasında paylaşım edərək Əfqanıstan Talibanının sözçüsünü təhdidlə üzləşmək əvəzinə “ ritorika və diqqəti yayındırma” taktikası yürütməkdə ittiham edib.
Nazirlik BMT Təhlükəsizlik Şurasının Analitik Dəstək və Sanksiyaların Monitorinqi Qrupunun S/2025/796 nömrəli, 16-cı hesabatına istinad edib. Hesabatda Əfqanıstanda “Təhrik-e-Taliban Pakistan”ın (TTP), yəni Pakistan Talibanının, təxminən 6 min döyüşçüsünün olduğu və Talibanın bu qrupa dəstək verdiyi qeyd edilir.
“Bu nəticələri inandırıcı şəkildə Pakistan təbliğatı kimi rədd etmək olmaz. Rejim sənədləşdirilmiş bu təhdidi inkar etməklə deyil, konkret addımlarla aradan qaldırmalıdır”, – nazirliyin açıqlamasında bildirilib.
İslamabad dialoqa açıq olduğunu, eyni zamanda silahlı qrupların sığınacaqlarının və dəstək şəbəkələrinin ləğvi üçün yoxlanıla bilən addımlar tələb etdiyini deyib. Nazirlik əlavə edib ki, Pakistan vətəndaşlarını və ərazi bütövlüyünü qorumaq üçün beynəlxalq hüquqa uyğun tədbirlər görəcək.
Sərhədyanı zərbələr gərginliyi artırıb
Pakistan sentyabrın 24-də Əfqanıstanın Qəndəhar, Paktika və Xost vilayətlərində dronların buraxılması və saxlanması üçün istifadə olunduğunu iddia etdiyi 10 məntəqəni hədəfə aldığını açıqlayıb.
Əfqanıstan rəsmiləri zərbələr nəticəsində dörd mülki şəxsin öldüyünü bildirərək İslamabadı ölkənin suverenliyini pozmaqda ittiham ediblər.
Əfqanıstan üzrə Moskva Formatının səkkizinci məsləhətləşmələri oktyabrın 5-də birgə bəyanat qəbul edilmədən başa çatıb. Pakistan və Əfqanıstan nümayəndələri bəyanatın mətnində razılığa gələ bilməyiblər. Dalana dirənmiş danışıqlar Əfqanıstandan qaynaqlandığı iddia edilən silahlı fəaliyyət və Pakistanın hərbi cavabı ilə bağlı davam edən fikir ayrılıqlarını əks etdirib.
Kabul Pakistandakı hücumların arxasında duran silahlılara sığınacaq verdiyini dəfələrlə inkar edib və İslamabadın sərhədyanı zərbələrini Əfqanıstanın suverenliyinin pozulması kimi pisləyib. Pakistan isə Əfqanıstan ərazisindən fəaliyyət göstərən silahlı qruplara qarşı yoxlanıla bilən tədbirlər görülməsini tələb edir.
