Ötən gün 95 -ci "Oscar" gecəsi keçirilib.
"Operativ Məlumat Mərkəzi-OMM" xəbər verir ki, film tarixi üçün əhəmiyyətli olan bu tədbir ABC kanalı tərəfindən canlı yayınlanıb.
Tədbirin aparıcısı 2017, 2018 -ci illərdən sonra yenidən Cimmi Kimmel olub.
Şou ərzində Ledi Qaqa, Rihanna, Riki Minor kimi ifaçılar öz performansları ilə gecəyə rəng qatıblar.
Mükafatlandırma mərasimində rekord nəticəni Danilellərin - Daniel Kvan və Daniel Şaynerin birlikdə rejissorluğu ilə ərsəyə gələn "Hər şey hər yerdə bir anda" filmi göstərmişdir. Belə ki, sözügedən film gecəyə 11 nominasiya ilə qatılaraq ümumilikdə 7 mükafata layiq görülüb.
Film Eveli Vanqın paralel kainatı ilə əlaqə saxlamağı haqqındadır. "New York Times" qəzeti bu filmi fantastika, döyüş sənəti filmləri və animasiya elementlərini özündə birləşdirən "janr anarxiyasının girdabı" adlandırıb.
Tədbiri yaddaqalan edən növbəti namizəd isə "Ən yaxşı aktrisa" nominasiyası ilə gecəyə qatılan ilk asiyalı qadın - Mişel Yeoh olub. Asiyalı namizədlər bununla da bitməyib. Belə ki. Aktyorlar arasından Ke Huy Quan və Yeoh "Oscar" mükafatına layiq görülüb.
Qeyd edək ki, ilk "Oscar" mükafatı 1929 -cu ildə Los Ancelesdə keçirilib.
Zümrüd Allahverdi
