OMM Redaksiyası
Oktyabrda Bakıda idman, kino, ədəbiyyat və incəsənət sahələrini əhatə edən beş böyük tədbir keçirilir. AnewZ-in məlumatına görə, paytaxt beynəlxalq iştirakçıları və qonaqları qəbul edir.
FIFA U-15 turniri. Bakıda ilk dəfə FIFA U-15 Dünya Kuboku və Festivalı keçirilir. Oktyabrın 22-dən 31-dək davam edəcək turnirdə dünyanın müxtəlif ölkələrindən gənc futbolçular mübarizə aparacaq. Yarış iştirakçılara beynəlxalq təcrübə qazanmaq və bacarıqlarını nümayiş etdirmək imkanı verir.
Bakı Beynəlxalq Film Festivalı. 17-ci Bakı Beynəlxalq Film Festivalı oktyabrın 21-də başlayıb. Altı gün davam edən festivalda beynəlxalq qısametrajlı filmlər, debüt tammetrajlı filmlər və Azərbaycan istehsalı olan ekran əsərləri təqdim olunur. Seçilmiş rejissorlar “Qızıl Nar” mükafatı uğrunda yarışır. Tədbir gənc rejissorlara dünyanın müxtəlif ölkələrindən olan kino sənayesi nümayəndələri ilə əlaqə qurmaq imkanı da yaradır.
“Sabah” – “Borussiya Dortmund” oyunu. “Sabah” FK oktyabrın 20-də Bakı Olimpiya Stadionunda UEFA Çempionlar Liqası çərçivəsində Almaniyanın “Borussiya Dortmund” klubunu qəbul edib. Dortmund təmsilçisi 2:1 hesabı ilə qalib gəlsə də, “Sabah” rəqibinə qarşı mübariz oyun nümayiş etdirib.
Bakı Beynəlxalq Kitab Sərgisi. 12-ci Bakı Beynəlxalq Kitab Sərgisi oktyabrın 21-də Bakı Ekspo Mərkəzində açılıb. Oktyabrın 27-dək davam edəcək sərgidə 30 ölkədən yazıçılar, nəşriyyatlar və mədəniyyət nümayəndələri iştirak edir. Proqrama kitab təqdimatları, müəlliflərlə görüşlər, müzakirələr və bütün yaş qrupları üçün ustad dərsləri daxildir. “Həyat ekrandan böyükdür: Bir uşaq, bir kitab, bir real dünya” şüarı ilə keçirilən sərginin məqsədi mütaliəyə marağı artırmaq və ədəbiyyat vasitəsilə mədəni mübadiləni təşviq etməkdir.
Bakı Beynəlxalq İncəsənət Festivalı. Oktyabrın 28-dən noyabrın 8-dək keçiriləcək festivalın proqramında musiqi, teatr, balet və vizual sənət tədbirləri yer alır. 20-dən çox tədbirin nəzərdə tutulduğu festivalda skripkaçı Maksim Vengerov və “Akram Khan Company” də iştirak edəcək. Proqramda müxtəlif sənət ənənələri və müasir çıxışlar təqdim olunacaq.
