OMM Redaksiyası
Avstraliya hökumətinin məlumatına görə, “OpenAI” şirkətinə məxsus süni intellekt agenti iyun ayında dövlətin “Medicare” statistika portalına icazəsiz giriş əldə edib. Hadisə səhiyyə xərcləri ilə bağlı açıq məlumatların araşdırılması zamanı baş verib.
Baş nazir Entoni Albanese bildirib ki, agent əvvəlcə girişə mane olan təhlükəsizlik məhdudiyyətləri ilə qarşılaşıb, lakin daha sonra həmin bloklamaları keçə bilib. O, hadisəni hökumət şəbəkəsinə süni intellekt sistemi tərəfindən müdaxilənin mümkün ilk nümunələrindən biri kimi qiymətləndirib.
Pasiyent məlumatlarına giriş olmayıb
Müdafiə naziri Riçard Marlsun sözlərinə görə, təsirə məruz qalan portalda yalnız ümumiləşdirilmiş səhiyyə məlumatları yerləşdirilib. Sistemdə pasiyentlərin tibbi tarixçələri, tibbi sığorta iddiaları, ödənişlər və bank məlumatları olmayıb.
“OpenAI” apardığı araşdırmada pasiyent məlumatlarına giriş əldə edildiyinə dair heç bir sübut aşkarlanmadığını açıqlayıb. Şirkət modellərinin məlumat axtarışı zamanı bir neçə Avstraliya hökumət saytları ilə qarşılıqlı əlaqədə olduğunu, lakin “nəzərdə tutulmayan hərəkətlər” etdiyini bildirib.
Hadisə araşdırılır
Albanese daha geniş şəbəkə pozuntusuna dair sübut olmadığını desə də, hadisənin qəbuledilməz olduğunu vurğulayıb. Baş nazir həmçinin “OpenAI” şirkətinin Avstraliya hökumətini iyunun hadisəsi barədə yalnız sentyabrın 10-da, təxminən üç ay sonra məlumatlandırmasını tənqid edib.
Hökumətin yaratdığı işçi qrupu təhlükəsizlik sistemlərinin fəaliyyəti daha əvvəl aşkarlaya bilməməsinin səbəblərini və digər dövlət saytlarının təsirə məruz qalıb-qalmadığını araşdıracaq.
Süni intellekt agentləri ilə bağlı narahatlıq
Hadisə internet saytlarına baxa, proqram təminatı ilə qarşılıqlı əlaqə qura və məhdud insan müdaxiləsi ilə tapşırıqları yerinə yetirə bilən süni intellekt agentləri ilə bağlı narahatlığı artırıb. “Anthropic”, “Google” və “Meta” kimi şirkətlərin sistemləri ilə bağlı oxşar hallar bu texnologiyalara nəzarət məsələsini gündəmə gətirib.
Kembric Universitetinin Ekzistensial Risklərin Tədqiqi Mərkəzinin riyaziyyatçısı Moris Çiodo hadisəni “ciddilik baxımından əhəmiyyətli eskalasiya” adlandırıb. Onun fikrincə, hökumətlər kompüter sistemlərinə icazəsiz girişlə bağlı mövcud qanunları tətbiq etməklə yanaşı, süni intellekt sahəsində yeni qaydalar da hazırlamalıdır.
