İran və Oman arasında Hörmüz boğazının birgə idarə olunması ilə bağlı konkret razılaşmaların hazırlanması məqsədilə danışıqların 30-60 gün davam edəcəyi bildirilib.
“Operativ Məlumat Mərkəzi-OMM” xəbər verir ki, bunu İranın xarici işlər nazirinin müavini Kazem Qəribabadi açıqlayıb.
Onun sözlərinə görə, tərəflər yaxın iki ay ərzində Hörmüz boğazının idarə olunması ilə bağlı gələcək razılaşmaları müzakirə edəcəklər.
"Bu müddət ərzində tərəflər boğazdan keçid üçün yeni və daimi marşrut barədə razılığa gəlməlidirlər", - nazir müavini qeyd edib.
Qəribabadi bildirib ki, ikitərəfli razılaşmaya əsasən, Fars körfəzinə giriş İranın ərazi sularından, çıxış isə Oman ərazi sularından həyata keçiriləcək.
Bununla belə, hər iki istiqamətdə gəmilər İranın ərazi sularından keçəcək.
Onun sözlərinə görə, razılaşdırılmış tranzit marşrutunun eni 7 mil olacaq.
İran rəsmisi ABŞ və digər ölkələrə müraciət edərək bildirib ki, Hörmüz boğazı İranla razılaşma olmadan açıq olmayacaq.
Qəribabadi həmçinin boğazın hazırda bağlı olduğunu və onun tamamilə İranın nəzarətində olduğunu iddia edib.
O, gəmilərin boğazdan keçməsi ilə bağlı yayılan məlumatları əsassız adlandırıb.
İran rəsmisi ABŞ Prezidenti Donald Trampın Hörmüz boğazının minalardan təmizlənməsi ilə bağlı açıqlamasını da təkzib edib və bu bəyanatları “boş sözlər” adlandırıb.
