Milli Hidrometeorologiya Xidmətinin "Operativ Məlumat Mərkəzi-OMM"-ə təqdim etdiyi məlumata əsasən, mayın 31-i saat 10:00-a olan vəziyyətə görə ölkənin bir sıra ərazilərində yağıntılı və küləkli hava şəraiti davam edib. Bəzi məntəqələrdə yağıntılar intensiv xarakter daşıyıb, Şahdağda isə qar müşahidə olunub.
Yağıntının miqdarı aşağıdakı kimi qeydə alınıb:
- Ordubad və İsmayıllıda 10 mm;
- Sabirabadda 9 mm;
- Daşkəsən və Astarada 8 mm;
- Göygöl və Sarıbaşda (Qax) 7 mm;
- Gədəbəy və Şahdağda 6 mm;
- Xızıda 5 mm;
- Culfa, Naftalan və Lənkəranda 4 mm;
- Şahbuz və Qubada 3 mm;
- Balakən, Zaqatala, Qəbələ, Tərtər və İmişlidə 2 mm;
- Bakı və Abşeron yarımadası, Naxçıvan, Şərur, Gəncə, Şəmkir, Tovuz, Oğuz, Şamaxı, Qobustan, Qusar, Şabran, Mingəçevir, Yevlax, Göyçay, Kürdəmir, Goranboy, Cəlilabad, Yardımlı, Lerik, Neftçala, Biləsuvar, Şəki, Ağdam, Laçın, Kəlbəcər və Qubadlıda isə 1 mm-dək.
Ərazidə şimal-qərb küləyi əsib. Küləyin maksimal sürəti Naftalanda 24 m/s, Mingəçevirdə 22 m/s, Şahdağda isə 20 m/s-dək güclənib. Bundan əlavə, mayın 30-da saat 13:02-13:06 aralığında Kəlbəcər rayonunun Çəpli kəndinə dolu düşdüyü qeyd olunub.
