Neftçala rayonunda narkotik vasitələrin qanunsuz dövriyyəsini təşkil etməkdə şübhəli bilinən 43 yaşlı Samiq Abuşov hüquq-mühafizə orqanları tərəfindən saxlanılıb.
"Operativ Məlumat Mərkəzi-OMM"-in məlumatına görə, bu barədə Daxili İşlər Nazirliyi açıqlama yayıb.
Bildirilib ki, keçirilən əməliyyat tədbirləri zamanı S.Abuşovun idarə etdiyi “Toyota” markalı avtomobilə baxış zamanı ümumi çəkisi 20 kiloqrama yaxın olan narkotik vasitələr – həşiş və marixuana aşkarlanaraq götürülüb.
İlkin istintaq zamanı saxlanılan şəxs ifadəsində bildirib ki, şəxsiyyəti araşdırılan İran vətəndaşı tərəfindən narkokuryerliyə cəlb olunub və narkotik maddələri Bakı şəhərinə çatdırmalı imiş.
Faktla bağlı cinayət işi başlanılıb, Samiq Abuşov barəsində məhkəmənin qərarı ilə həbs qətimkan tədbiri seçilib. Araşdırmalar davam etdirilir.
