Azərbaycanın ekologiya və təbii sərvətlər naziri, Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) prezidenti Muxtar Babayev G7-nin İtaliyanın Turin şəhərində keçirilən İqlim, Enerji və Ətraf Mühit Nazirlər Toplantısında iştirak edir.

"Operativ Məlumat Mərkəzi-OMM" xəbər verir ki, bu barədə COP29 məlumat yayıb.

“COP29 Turində G7-nin İqlim, Enerji və Ətraf Mühit üzrə Nazirlər Toplantısında iştirak edir”, – məlumatda bildirilib.

COP29-un yaydığı şəkillərə əsasən, Muxtar Babayev tədbirdə çıxış edib, italiyalı həmkarı Cilberto Piketto-Fratinlə görüşüb.

Azərbaycan Braziliyaya başsağlığı verib.

"Operativ Məlumat Mərkəzi-OMM" xəbər verir ki, bununla bağlı Azərbaycan Xarici İşlər Nazirliyi "X" səhifəsində paylaşım edib.

"Braziliyanın Rio-Qrande-du-Sul əyalətində daşqınlar nəticəsində yaranan dağıntılar və insan tələfatı bizi kədərləndirdi. Həlak olanların ailələrinə başsağlığı verir və bu fəlakətdən zərər çəkənlərə tezliklə şəfa diləyirik", - paylaşımda deyilir.

Azərbaycanın Xarici İşlər Nazirliyi Əfqanıstana başsağlığı verib.

"Operativ Məlumat Mərkəzi-OMM" xəbər verir ki, bununla bağlı XİN-in “X”dəki hesabında paylaşım edilib.

“Əfqanıstanda baş verən dağıdıcı daşqınlar bizi dərindən kədərləndirdi.

Bu fəlakətdə həyatını itirənlərin ailələrinə və yaxınlarına başsağlığı veririk”, - XİN qeyd edib.

Efiopiyanın xarici işlər naziri Taye Atske Selassie Azərbaycan səfiri Ruslan Nəsibovu qəbul edib.

"Operativ Məlumat Mərkəzi-OMM" xəbər verir ki, bu barədə Efiopiyanın baş diplomatı sosial şəbəkədə bildirib.

“Azərbaycanın səfiri cənab Ruslan Nəsibov ilə görüşdə ikitərəfli əməkdaşlığımızın gücləndirilməsi və 2024-cü ilin noyabrında Bakıda keçiriləcək COP29 Sammiti ilə bağlı müzakirələr aparılıb”, – XİN başçısı qeyd edib.

O, COP29-un “planların gerçəkləşdiyi yer olacağına və iqlim fəaliyyətinə dair anlamlı addımlar atan ölkələrin iqlim böhranını həll etmək səylərində tanınacaq və dəstəklənəcəyi bir hadisə olacağına ümidvar olduğunu” vurğulayıb.

Xarici işlər nazirinin müavini, COP29-un aparıcı müzakirəçisi Yalçın Rəfiyev və COP29-un Danışıq Qrupu Bakıda Bakıda iqlim dəyişikliyi gündəliyi ətrafında fikir mübadiləsi aparmaq üçün Baham adaları, Tonqa və Tuvaludan olan yüksək səviyyəli nümayəndə heyətləri ilə görüşüb.

"Operativ Məlumat Mərkəzi-OMM" xəbər verir ki, bu barədə COP29-un sosial şəbəkə hesabında bildirilib.

“Aparıcı müzakirəçi Yalçın Rəfiyev və COP29 Danışıq Qrupu Bakıda iqlim dəyişikliyi gündəliyi və prioritetləri müzakirə etmək üçün Baham adaları, Tonqa və Tuvaludan olan yüksək səviyyəli nümayəndə heyətləri ilə görüşüb”, – paylaşımda diqqətə çatdırılıb.

Qeyd olunub ki, görüşdə “İnkişaf etməkdə olan Kiçik Ada Dövlətlərinin (İKAD) iqlim dəyişikliyinin mənfi təsirlərinə qarşı xüsusilə həssas olduğuna” diqqət çəkilib.

Vurğulanıb ki, COP29-un Danışıq Qrupu Bakıda keçiriləcək tədbirədək “İKAD ilə əlaqə saxlamağa davam edəcək”.

10-11 may 2024-cü il tarixlərində Azərbaycan Respublikasının xarici işlər naziri Ceyhun Bayramov və Ermənistan Respublikasının xarici işlər naziri Ararat Mirzoyan arasında Qazaxıstanın Almatı şəhərində danışıqlar aparılıb.

"Operativ Məlumat Mərkəzi-OMM" xəbər verir ki, bu barədə Azərbaycan XİN məlumat yayıb.

Məlumata görə, nazirlər delimitasiya üzrə irəliləyişi və bununla bağlı əldə edilmiş razılaşmaları alqışlayıblar. Nazirlər və onların nümayəndə heyətləri “Azərbaycan və Ermənistan arasında sülhün və dövlətlərarası münasibətlərin təsis edilməsi haqqında ikitərəfli Saziş” layihəsinin müddəalarının müzakirəsini davam etdiriblər. Tərəflər hələ də fikir ayrılıqlarının mövcud olduğu açıq qalan məsələlər üzrə danışıqları davam etdirməyə razılaşıblar.

Səfər çərçivəsində, nazirlər Qazaxıstanın Baş nazirinin müavini - xarici işlər naziri Murat Nurtleu ilə ayrı-ayrılıqda ikitərəfli, o cümlədən üçtərəfli formatda görüşüblər.

Nazir Ceyhun Bayramov Azərbaycan və Ermənistan arasında danışıqlara ev sahibliyi etdiyinə görə Qazaxıstan tərəfinə minnətdarlığını bildirib.