Futzal üzrə DÇ-2024-ün əsas mərhələsində Azərbaycan millisinin rəqibi olacaq Polşa yığması yoldaşlıq oyunu keçirəcək.

"Operativ Məlumat Mərkəzi- OMM" xəbər verir ki, rəqibimiz martın 3-də Kolobrzeqdə Ukrayna futzalçıları ilə qarşılaşacaq.

Qeyd edək ki, Polşa – Azərbaycan görüşü martın 7-də keçiriləcək. Buna qədər komandamız martın 3-də Bakı İdman Sarayında Yunanıstanla üz-üzə gələcək.

Basketbol üzrə Azərbaycan Kubokunun keçirilmə tarixi açıqlanıb.

Federasiyadan "Operativ Məlumat Mərkəzi-OMM"- ə verilən məlumata görə, oyunlar 21 - 26 martda "Sərhədçi" İdman Mərkəzində baş tutacaq.

İki qrupda ümumilikdə 8 komandanın iştirakı ilə keçiriləcək kubok matçları dairəvi sistemdə oynanılacaq. Qruplarda ilk iki yeri tutmuş kollektivlər yarımfinala vəsiqə qazanacaqlar. 26 martda final görüşü keçiriləcək.

Qeyd edək ki, basketbol üzrə Azərbaycan Kubokunun püşkatma mərasimi fevralın 21-də olacaq və federasiyanın rəsmi "youtube" səhifəsindən canlı yayımlanacaq.