İtaliya mətbuatının yaydığı məlumata görə, "Milan" klubu mərkəz hücumçusu Niklas Füllkruqun satınalma hüququndan istifadə etməmək qərarına gəlib.
“Operativ Məlumat Mərkəzi-OMM”-in xəbərinə görə, bu isə o deməkdir ki, almaniyalı futbolçu 2025/26 mövsümünün sonunda "West Ham" klubuna qayıdacaq.
Füllkruq yanvar transfer pəncərəsinin əvvəlində təxminən 5 milyon avroya satınalma opsionu ilə icarə əsasında "Milan"a keçmişdi. Həmin vaxt komandanın hücum xəttində problemlər var idi.
Santyaqo Ximenes zədəli olduğu üçün baş məşqçi Massimiliano Alleqri hücumda tez-tez Rafael Leao, Kristian Pulişiç və ya Kristofer Nkunku kombinasiyasından istifadə edirdi.
Almaniyalı hücumçunun İtaliya klubundakı statistikası aşağıdakı kimidir:
- Ümumi oyun sayı: 16 matç
- Əsas heyətdə çıxış: 3 dəfə
- Vurduğu qol: 1 qol (18 yanvarda "Lecce"yə qarşı)
Tanınmış idman jurnalisti Fabrisio Romanonun sözlərinə görə, Füllkruq 2025/26 mövsümünün sonunda "West Ham"a geri göndəriləcək və İngiltərə Premyer Liqası təmsilçisi öz növbəsində oyunçunu birdəfəlik satmağa çalışacaq.
