ABŞ dövlət katibi Marko Rubio Meksikanı qanunsuz miqrasiya, fentanil qaçaqmalçılığı və narkotik kartelləri ilə mübarizədə daha qətiyyətli addımlar atmağa çağırıb.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, Rubio Vaşinqtonda Meksikanın xarici işlər naziri Roberto Velasko Alvareslə görüşüb.
O, görüş zamanı qanunsuz miqrasiyaya son qoyulması, fentanil və digər qanunsuz narkotiklərin ABŞ-yə daxil olmasının qarşısının alınması, xarici terror təşkilatları və narkotik kartellərinin dağıdılması, eləcə də bu qrupların silahlardan məhrum edilməsi üçün qətiyyətli tədbirlər görülməsinə çağırıb.
Meksika Xarici İşlər Nazirliyinin məlumatına görə, görüşdə iki ölkə arasında təhlükəsizlik sahəsində əməkdaşlıq, narkotik və silah qaçaqmalçılığı, həmçinin transmilli mütəşəkkil cinayətkarlıqla mübarizədə əldə olunan irəliləyişlər müzakirə olunub. Velasko isə əməkdaşlığın suverenliyə, ərazi bütövlüyünə, qarşılıqlı məsuliyyətə və etimada əsaslanmasının vacibliyini vurğulayıb.
Tərəflər həmçinin qeyri-qanuni miqrasiya məsələsində əldə olunan nəticələri və ABŞ-də yaşayan meksikalıların miqrasiya prosesləri zamanı hüquqlarının qorunmasını müzakirə ediblər.
