NATO-nun Baş katibi Mark Rutte çərşənbə günü Ağ Evdə ABŞ Prezidenti Donald Tramp ilə görüşməyə hazırlaşır.
"Operativ Məlumat Mərkəzi-OMM" xəbər verir ki, bu barədə beynəlxalq media orqanları məlumat yayıb.
Məlumata görə, görüş alyansın İranla bağlı artan gərginlik, Avropadakı ABŞ hərbi kontingentinin gələcəyi və NATO daxilində yaranan fikir ayrılıqları fonunda baş tutur. Səfər iyul ayında Ankarada keçiriləcək NATO sammitindən bir neçə həftə əvvəl planlaşdırılıb.
Bildirilib ki, son aylarda Vaşinqton və NATO müttəfiqləri arasında münasibətlərdə müəyyən gərginlik müşahidə olunur. ABŞ Prezidenti Donald Tramp müttəfiq ölkələri İranla bağlı əməliyyatlarda Vaşinqtona kifayət qədər dəstək verməməkdə ittiham edib və alyansın qarşılıqlı müdafiə öhdəliklərinə sadiqliyi ilə bağlı suallar qaldırıb.
Qeyd olunub ki, ABŞ-nin müdafiə naziri Pete Heqset də Avropadakı Amerika hərbi mövcudluğunun yenidən qiymətləndirilə biləcəyini açıqlayıb və müttəfiqləri müdafiə xərclərinə qeyri-kafi töhfə verməkdə günahlandırıb.
Analitiklərin fikrincə, Mark Ruttenin Vaşinqton səfərinin əsas məqsədi iyul sammitində mümkün qarşıdurmaların qarşısını almaq və tərəflər arasında ortaq mövqe formalaşdırmaqdır. “Carnegie Endowment for International Peace” təşkilatının eksperti Stephen Wertheim bildirib ki, Rutte Tramp administrasiyası ilə balanslı münasibət qurmağa çalışır, lakin ABŞ prezidentinin dəyişkən mövqeyi bu prosesi çətinləşdirir.
Öz növbəsində, Rutte “Fox News”a müsahibəsində İran məsələsində fikir ayrılıqlarını azaltmağa çalışaraq bəzi halların “fərdi və təcrid olunmuş” xarakter daşıdığını qeyd edib. O, həmçinin NATO üzvlərinin müdafiə xərclərini artırdığını və yaxın günlərdə bu istiqamətdə yeni rəqəmlərin açıqlanacağını bildirib.
Qeyd olunub ki, iyulun 7-8-də Ankarada keçiriləcək NATO sammitində əsas müzakirə mövzuları müdafiə xərclərinin artırılması, hərbi istehsalın genişləndirilməsi və Ukraynaya dəstəyin davam etdirilməsi olacaq. Alyans daxilində bəzi ölkələrin hədəf göstəricilərdən geri qalması fonunda, Ruttenin diplomatik səylərinin nəticələri diqqətlə izlənilir.
