Afət Ziyadqızı
Rusiya Xarici İşlər Nazirliyinin rəsmi nümayəndəsi Mariya Zaxarova Estoniya rəsmisinin Ukraynaya Rusiya ərazisinə zərbələr endirməkdə yardım göstərməyə hazır olduqları barədə səsləndirdiyi iddia edilən açıqlamanı şərh edib.
“Operativ Məlumat Mərkəzi-OMM” xəbər verir ki, Zaxarova bu bəyanatı “terror aktında iştirak” kimi qiymətləndirib.
Məlumata görə, məsələ rusiyalı “prankerlər” Vovan və Leksusun Estoniya prezidentinin milli təhlükəsizlik üzrə müşaviri Madis Roll ilə apardıqları danışıqdan sonra gündəmə gəlib.
Bildirilib ki, özlərini Ukrayna Milli Təhlükəsizlik və Müdafiə Şurasının katibi kimi təqdim edən şəxslərlə söhbət zamanı Madis Roll Ukraynanın Sankt-Peterburqa mümkün hücumlarının koordinasiyasında yardım göstərməyə hazır olduqlarını deyib.
Qeyd olunub ki, Mariya Zaxarova məsələni şərh edərkən Estoniya siyasi elitasını tənqid edib. Onun sözlərinə görə, “terrorçuları dəstəkləmək Estoniya siyasi elitası üçün yeni hal deyil” və bu yanaşmanın 1990-cı illərdən mövcud olduğunu iddia edib.
Məlumata görə, söhbət zamanı Madis Roll Estoniya rəhbərliyinin Ukraynanı dron hücumlarında ittiham etmədiyini də bildirib.
Xatırladaq ki, cari ilin mayın 19-da Estoniya ərazisinə daxil olan pilotsuz uçuş aparatı vurulmuşdu. Estoniyanın müdafiə naziri Hanno Pevkur həmin pilotsuz uçuş aparatının Ukraynaya məxsus olduğunu açıqlamışdı. Daha sonra ölkənin baş naziri Kristen Mixal isə Ukraynanın gələcəkdə bu cür hadisələrin təkrarlanmayacağına dair təminat verə bilmədiyini bildirmişdi.
