Nazirlər Kabineti kommersiya hüquqi şəxslərlə bağlı mühüm dəyişikliyə imza atıb. Dəyişiklik 10 oktyabr 2018-ci il tarixli qərarla təsdiq edilmiş "Kommersiya hüquqi şəxslərin təsisçiləri (iştirakçıları), nizamnamə kapitalındakı payları və qiymətli kağızların mülkiyyətçiləri barədə məlumatların öhdəlik daşıyan şəxslərə verilməsi Qaydası"nı əhatə edir.
“Operativ Məlumat Mərkəzi-OMM” xəbər verir ki, bununla bağlı Baş nazir Əli Əsədov yeni əmr imzalayıb.
Qərara əsasən, Qaydadan benefisiar mülkiyyətçi (arxasında duran real sahibi) anlayışı çıxarılıb. Onun yerinə kommersiya hüquqi şəxslərin təsisçiləri (rəsmi qeydiyyatda olan sahib) anlayışı daxil edilib.
Beləliklə, bundan sonra maliyyə institutlarına benefisiar mülkiyyətçi barədə məlumat verilməyəcək. Bunun əvəzinə, kommersiya hüquqi şəxslərin təsisçiləri (iştirakçıları), nizamnamə kapitalındakı payları və qiymətli kağızların mülkiyyətçiləri barədə məlumatlar təqdim ediləcək.
