Afət Ziyadqızı
Hindistanın Mumbay şəhərində keçirilən hərracda Mahatma Qandiyə məxsus şəxsi qeydlər böyük məbləğə satılıb.
“Operativ Məlumat Mərkəzi – OMM” xəbər verir ki, 600-dən çox əlyazma mesajını özündə birləşdirən kolleksiya 1,69 milyon dollar qarşılığında alıcıya satılıb.
Tarixi sənədlərin Qandinin həqiqət, zorakılıqsız mübarizə və özünənəzarət prinsipləri ilə bağlı düşüncələrini əks etdirdiyi bildirilir.
Hərracı təşkil edən “Saffronart” müzayede evinin açıqlamasına görə, sözügedən satış Hindistan tarixinə aid sənədlər üçün ödənilən ən yüksək məbləğ olub.
Alıcının kimliyi açıqlanmayıb. Bununla belə, tarixi əhəmiyyət daşıyan sənədlərin Hindistan ərazisində qalacağı bildirilib.
Qeyd edək ki, zorakılıqdan imtina və sosial ədalət uğrunda mübarizəni təbliğ edən “Satyagraha” hərəkatının banisi olan Mahatma Qandi ölümündən illər sonra da dünya üzrə fərdi azadlıq və vətəndaş hüquqları müdafiəçiləri üçün mühüm ilham mənbəyi olaraq qalır.
