Rusiyada elektron ticarət platforması olan "Ozon" şirkətinin "Orenburq" və "Ufa" şəhərlərində yerləşən logistika mərkəzlərinin gecə saatlarında PUA hücumuna məruz qaldığı bildirilib.
“Operativ Məlumat Mərkəzi-OMM” xəbər verir ki, bununla bağlı şirkət məlumat yayıb.
Ozonun açıqlamasına görə, hücum zamanı müəssisələrdə çalışan bütün əməkdaşlar təxliyə edilib.
İlkin məlumata əsasən, hadisə nəticəsində xəsarət alan olmayıb.
Şirkət hücumların ardından logistika mərkəzlərində yanğın baş vermədiyini bildirib, Orenburqdakı mərkəzin fəaliyyətini bərpa etdiyi qeyd olunub.
Ufadakı logistika mərkəzində isə kiçikmiqyaslı zərərin yarandığı bildirilib. Müəssisə ətraflı texniki baxış keçirilməsi üçün müvəqqəti olaraq fəaliyyətini dayandırıb.
Qeyd edək ki, son günlər Ukraynanın Rusiyada fəaliyyət göstərən elektron ticarət platformalarının logistika və anbar obyektlərinə PUA hücumlarını artırdığı bildirilir.
"Ozon"un Orenburq və Samara bölgələrindəki obyektləri də son günlər hücumların hədəfinə çevrilib.
