Küveyt hökuməti müxtəlif fövqəladə halların nəticələrinin operativ şəkildə aradan qaldırılması məqsədilə 100 milyon ABŞ dolları həcmində xüsusi fond yaradıb.
“Operativ Məlumat Mərkəzi-OMM” xəbər verir ki, bununla bağlı ölkənin Xarici İşlər Nazirliyi məlumat yayıb.
Bildirilib ki, fondun yaradılmasında əsas məqsəd hərbi əməliyyatlar və ya digər gözlənilməz hadisələr nəticəsində zərər görmüş strateji əhəmiyyətli infrastrukturun bərpası üçün dövlət vəsaitinin mümkün qədər tez ayrılmasını təmin edən mexanizmin formalaşdırılmasıdır.
Qeyd olunub ki, bu qərar İranın zərbələrinin nəticələrinin aradan qaldırılması zamanı əldə olunan təcrübə əsasında qəbul edilib.
Həmin dövrdə Küveyt hakimiyyəti infrastruktur obyektlərinə dəyən ziyanın aradan qaldırılması üçün operativ tədbirlər görməli olub.
Məlumatda həmçinin qeyd olunub ki, iyunun əvvəlində Küveyt Müdafiə Nazirliyi İranın ölkə ərazisinə doğru 13 ballistik raket və 17 zərbə tipli pilotsuz uçuş aparatı buraxdığını açıqlamışdı.
Cari ilin yaz aylarında da Küveyt rəsmiləri İranın ABŞ-nin İslam Respublikasına qarşı həyata keçirdiyi əməliyyatlara cavab olaraq ölkə ərazisinə zərbələr endirdiyini bildirmişdilər.
