Afət Ziyadqızı
İstanbul şəhərinin Maltepe rayonunun Cevizli məhəlləsində yerləşən yeddimərtəbəli yaşayış binasının ilk üç mərtəbəsi hələlik müəyyən edilməyən səbəbdən kəskin şəkildə çöküb.
"Operativ Məlumat Mərkəzi-OMM" xəbər verir ki, hadisə yerinə dərhal cəlb olunan Fövqəladə Halların İdarə Olunması Agentliyinin (AFAD) və xilasetmə briqadalarının operativ tədbirləri nəticəsində dağıntılar altından 10 nəfər sağ çıxarılıb, iki sakinin isə meyiti aşkar edilib.
İstanbul valisi Davut Gül dağıntılar altında qaldığı ehtimal edilən daha üç nəfərin axtarış-xilasetmə əməliyyatlarının fasiləsiz davam etdirildiyini bildirib.
Hadisə ilə bağlı prokurorluq tərəfindən genişmiqyaslı istintaq-əməliyyat tədbirləri başladılıb. Tikintiyə cavabdeh olan şəxslərin müəyyənləşdirilməsi çərçivəsində binanın memarı H.B. və tikinti sahəsinin məsul rəhbəri hüquq-mühafizə orqanları tərəfindən saxlanılıb. Araşdırmalar zamanı binanın ilkin sahibi D.B.-nin 2016-cı ildə vəfat etdiyi müəyyən olunub.
İstanbul Anadolu Baş Prokurorluğunun tapşırığına əsasən, zamanında tikinti icazəsi sənədlərinə imza atmış vəzifəli şəxslərin dairəsi müəyyənləşdirilir və şübhəlilərin dindirilməsindən sonra əlavə prosessual addımların atılması nəzərdə tutulur.
