İsrail Müdafiə Qüvvələri təhlükəsizliyi təmin etmək məqsədilə Livanın cənub rayonlarında fəal yerüstü əməliyyatlar həyata keçirir.
Bu barədə məlumatı “Operativ Məlumat Mərkəzi-OMM” ordunun mətbuat xidmətinə istinadən xəbər verir.
Rəsmi məlumata görə, 91-ci diviziyanın tərkibində fəaliyyət göstərən ordunun 8-ci briqadasının hərbi qulluqçuları nöqtəvi yerüstü əməliyyatları davam etdirir. Əsas məqsəd Livanın cənubunda müdafiə xəttinin möhkəmləndirilməsi və İsrailin şimal ərazilərinin sakinlərinin təhlükəsizliyinin təmin edilməsidir.
Keçirilmiş əməliyyatlar çərçivəsində İsrail hərbçiləri şimal hissəyə yönəldilmiş raket buraxılış qurğusunu aşkar ediblər. Həmçinin, Livanın radikal qruplaşması olan "Hizbullah" tərəfindən zərbələrin hazırlanması üçün istifadə olunan tank əleyhinə raket kompleksləri və digər silah növləri müəyyən edilib.
Xatırladaq ki, aprelin 14-də Vaşinqtonda ABŞ-ın himayəsi altında Livan-İsrail təmaslarının ilkin raundu keçirilib. Bu görüşün əsas məqsədi atəşkəs sazişinin əldə edilməsi üçün sülh danışıqlarının başlama tarixini müəyyənləşdirmək olub.
