"İrana qarşı hər hansı bir təcavüz, Yaxın Şərqdəki ABŞ və müttəfiqlərinin bütün hərbi infrastrukturuna zərbə endirilməsi ilə nəticələnəcək".
"Operativ Məlumat Mərkəzi-OMM" xəbər verir ki, bu sözləri İranın Ali Lideri Əli Xameneinin İslam İnqilabı Keşikçiləri Korpusundakı nümayəndəsi Abdullah Hacı Sadeqi bildirib.
"ABŞ-nin və onun regional muzdlularının bütün infrastrukturu əlimizdədir. Silahlı qüvvələr döyüşə hazırdır və düşmənin hər hansı bir hərəkəti quruda, dənizdə və bölgədəki bütün ABŞ bazalarında sarsıdıcı cavabla qarşılaşacaq", - o qeyd edib.
Xatırladaq ki, ABŞ prezidenti Donald Tramp daha əvvəl İrana doğru nəhəng bir armadanın getdiyi bildirmişdi.
O, Tehranın danışıqlar masasına oturub nüvə silahlarından tamamilə imtina etməyi də əhatə edən ədalətli və bərabər bir razılaşma imzalayacağına ümid etdiyini bildirmişdi.
Amerika lideri ötən ilin iyun ayında ABŞ-nin İslam Respublikasının nüvə obyektlərinə zərbə endirdiyini xatırladıb.
O, növbəti hücumun daha da pis olacağı barədə xəbərdarlıq etmiş və bunun baş verməsinə yol verməməyə çağırmışdı.
