OMM Redaksiyası
FIFA prezidenti Canni İnfantino Bakıda 15 yaşadək futbolçular arasında ilk dünya çempionatının və FIFA festivalının təşkili üçün hazırlığın başa çatdığını açıqlayıb. O, dünyanın müxtəlif ölkələrindən 189 komandanın Azərbaycanda bir araya gələcəyini bildirib.
İnfantinonun sözlərinə görə, turnir futbolun hər kəsə məxsus olduğu barədə dünyaya mesaj verir. O, uşaqların gələcəyinə sərmayə qoyulmasının və futbol sevgisinin insanları birləşdirməsinin sevinc bəxş etdiyini, arzuların gerçəkləşməsinə kömək etdiyini qeyd edib.
FIFA rəhbəri Azərbaycan Futbol Federasiyaları Assosiasiyasının prezidenti Rövşən Nəcəfi və AFFA-nın komandasını gördükləri işə və futbola bağlılıqlarına görə təbrik edib. O, Azərbaycanda olan futbolçulara, məşqçilərə və əməkdaşlara uğurlar arzulayıb, onlara hər anın dadını çıxarıb tarix yazmağı diləyib.
FIFA-nın məlumatına görə, dünya çempionatının oyunlarının böyük hissəsinin keçiriləcəyi Hövsan yarış kompleksi 66 gün ərzində inşa olunub. Turnirin yekun qarşılaşmaları oktyabrın 30-da keçiriləcək.
Kontekst
Xatırladaq ki, sentyabrın 29-da Bakıda olan Canni İnfantino Hövsanda inşa edilən və qısa müddətdə istifadəyə hazırlanan 10 meydançaya baxış keçirib.
