OMM Redaksiyası
Bolqarıstan Respublikasının vitse-prezidenti İliyana Yotova Azərbaycan Respublikasının Prezidenti İlham Əliyevə təbrik məktubu göndərib. Məktubda Azərbaycanın Müstəqillik Günü münasibətilə ən xoş arzular çatdırılıb.
İliyana Yotova Bakıda keçirilən Ümumdünya Şəhərsalma Forumunun 13-cü sessiyası zamanı ona və nümayəndə heyətinə göstərilən qonaqpərvərliyə görə minnətdarlığını bildirib. O, sessiyada Bolqarıstan bələdiyyələrinin 10-dan çox meri və ali təhsil müəssisələrinin nümayəndələrinin iştirak etdiyini xatırladaraq, tədbirdən xoş təəssüratlarla ayrıldıqlarını qeyd edib.
Məktubda son üç ayda Prezident İlham Əliyevlə ikinci dəfə görüşməkdən məmnunluq duyduğu vurğulanıb və bunun ölkələr arasında intensiv siyasi dialoqun göstəricisi olduğu bildirilib. İliyana Yotova əməkdaşlığın konkret nəticələrə çevrilməsinin vacibliyini qeyd edərək, bir sıra prioritet istiqamətləri vurğulayıb:
- Enerji sahəsində razılaşmaların icrası və təbii qaz tədarükünün artırılması;
- Azərbaycan, Gürcüstan, Türkiyə və Bolqarıstan arasında "yaşıl enerji" dəhlizinin yaradılması;
- Sənaye zonaları və texnoloji parklar sahəsində tərəfdaşlıq;
- Təhsil və mədəniyyət sahələrində əlaqələrin genişləndirilməsi.
Vitse-prezident Prezident İlham Əliyevi Bolqarıstana dəvət edib və Veliko Tırnovo şəhərində "Şuşa Parkı"nın birgə açılışını etməyin şərəf olacağını bildirib. Məktub dövlət başçısına və ailəsinə xoş arzularla yekunlaşıb.
