Prezident İlham Əliyev 31-ci "Baku Energy Forum"un rəsmi açılış mərasimindəki çıxışında "Bakı Enerji Həftəsi"nin qlobal enerji məkanındakı nüfuzuna toxunub. Dövlət başçısı ABŞ Prezidenti Donald Trampın, Türkiyə Prezidenti Rəcəb Tayyib Ərdoğanın və Birləşmiş Krallığın Baş naziri Kir Starmerin tədbirə ünvanladıqları məktublara görə təşəkkürünü bildirib.
Azərbaycan Prezidenti xüsusilə Donald Trampın enerji məsələləri ilə bağlı mövqeyini yüksək qiymətləndirərək, onun bu sahəni normal məcraya qaytardığını vurğulayıb:
- Uzun illərdir neft-qaz hasilatı ilə məşğul olan ölkələr və şirkətlər əsassız ittihamlarla üzləşirdilər.
- Prezident Tramp bu tendensiyanı dəyişərək praqmatik bir yanaşma ortaya qoyub.
- Dünyanın enerji ehtiyacları nəzərə alınmalı, enerji təhlükəsizliyi ilə bərpaolunan enerji mənbələrinə investisiyalar arasında balans qorunmalıdır.
İlham Əliyev qeyd edib ki, neft və qaz adi əmtəədir və ölkələr təbii sərvətlərə sahib olduqlarına görə deyil, bu gəlirlərdən necə istifadə etdiklərinə görə qiymətləndirilməlidirlər. Azərbaycanın öz inkişaf yolunda neft və qazdan səmərəli istifadə etdiyini xatırladan dövlət başçısı, milli maraqlara əsaslanan müdrik siyasətin və beynəlxalq sərmayələrə açıq olmağın uğurun əsas şərti olduğunu bildirib.
