Hurtado: “Avrokuboklara vəsiqə üçün sonadək mübarizə aparacağıq”

“Turan Tovuz”un kolumbiyalı futbolçusu Hayderson Hurtado komandasının avrokuboklara vəsiqə uğrunda mübarizəni sona qədər davam etdirəcəyini deyib.

Futbolçu bildirib ki, “Qarabağ”, “Neftçi”, “Sabah” və “Zirə” ilə rəqabət asan olmayacaq, amma komandası özünə inanır. Hurtadonun sözlərinə görə, “Turan Tovuz” oyundan-oyuna inkişaf etməli, qazanılan qələbədən sonra növbəti matça köklənməlidir.

Kolumbiyalı oyunçu milli fasilənin komanda üçün faydalı olduğunu, istirahətin hamıya kömək etdiyini qeyd edib. O, həmyerlisi Kamilo Duranın Kolumbiya millisinə çağırılmamasının Azərbaycan Premyer Liqasının səviyyəsi ilə bağlı olduğunu düşünmür. Hurtado özü isə milli komandadan dəvət gözləmədiyini söyləyib.

“İmişli” ilə qarşıdakı görüşə dair danışan futbolçu əvvəlcə bərpa olunmalı, sonra məşqlərə qayıtmalı olduqlarını bildirib. O, matça həftə ərzində hazırlaşacaqlarını deyib.

Hurtadonun fikrincə, əsas məqsəd yaxşı və ya pis oyundan asılı olmayaraq üç xal qazanmaqdır.