OMM Redaksiyası
“Turan Tovuz”un baş məşqçisi Kurban Berdiyev Azərbaycan Premyer Liqasının səkkizinci turunda “İmişli”yə 0:1 hesabı ilə uduzduqları oyunu dəyərləndirib. Mütəxəssis matçdan sonra keçirilən mətbuat konfransında rəqibin qələbəyə layiq olduğunu deyib.
“Bu gün “İmişli” layiqli qələbə qazandı. Standart vəziyyətlərdən ehtiyat edirdik və məhz belə epizodların birində qol buraxdıq. Məşqlərdə bu məqamlar üzərində işləsək də, yenə səhvə yol verdik. Bundan başqa, yaratdığımız azsaylı qol imkanlarından da istifadə edə bilmədik”, – deyə Berdiyev bildirib.
“Turan Tovuz”un standart vəziyyətlərdə təhlükəli komanda olmasına baxmayaraq, bu görüşdə fərqlənə bilməməsinin səbəbi barədə suala baş məşqçi standartlar üzərində kifayət qədər çalışdıqlarını, lakin hər dəfə qol vurmağın mümkün olmadığını söyləyib. Berdiyevin sözlərinə görə, rəqib öz fürsətindən yararlanıb.
Yevlax şəhər stadionunda keçirilən qarşılaşmanın taleyini 25-ci dəqiqədə Dioqo Rollonun vurduğu qol həll edib. Məğlubiyyətdən sonra “Turan Tovuz” səkkiz oyunda topladığı 14 xalla turnir cədvəlinin dördüncü pilləsində qərarlaşıb.
